Diamars den careda di 10’or di anochi 2 patruya di Polis a bay cu urgencia na un adres na San Barbola 60-D unda supuestamente mester a descubri un choller den cura.
Ora Polis a yega na e adres a bin compronde cu e incidente mes a pasa hopi mas prome den careda di 8’or di anochi. Segun informacion di esnan di e cas y bisiñanan, algun bisiña mucha homber hoben, a scucha desorden den cura di e adres menciona.
A scucha un persona ta coba den toolbox di e mecanico di e adres. Ora e mucha homber hoben a bay wak a topa un persona color bruin den cura. Momento cu e persona a haya sa cu e a wordo descubri, el a hisa un pida palo cu e tabata tin cun’e y medio menasa e mucha homber. E persona aki a huy di e luga despues.
E straño ta cu Polis a wordo poni na altura den careda di 10’or di anochi y a kere cu e situacion tabata andando ainda. Polis a yega rapidamente pero despues a djis tuma datos, ya cu e situacion mes tabata di 8’or. E bisiñanan mes lo keda vigila e bario pa medio di un whatsapp group chat.
