Funcionarionan di e seccion di carta di garantia na Vondellaan ta sumamente disgusta cu desaroyonan di ultimo dianan.
Desde cu e hefe di Migracion a ser suspendi na un manera incorecto, funcionarionan di Migracion Vondelaan a purba di haya contacto cu minister di husticia pa duna un aclaracion riba un supuesto sucedido cu a sali di un skina di redo, pero te dia di awe drentando di 3 siman, no a logra haya atencion di e mandatario.
Loke ta lanta e disgusto grandi den e trahadonan ta e forma con tur cos a cana. Despues cu e hefe di seccion di carta di garantia, kende nunca tabata hefe riba papel, a ser poni un banda di su puesto dor di management team, no a keda contento cu e decision aki e tempo ey a dicidi di hiba un redo falso na oido di minister di husticia, cual a haya tur atencion.
E ex hefe di seccion aki hunto cu su assistent reciente, un contractant di despacho di minister Bikker kende porcierto ta prima di e mandatario aki, a haya un chens pa hiba un keho basa riba redashi contra managment team, treciendo acusacionnan falso sin ningun prueba riba sr Matos.
Con ta posibel cu un persona cu no tabata presente e dia en cuestion por haya tur atencion cu tur su falsedadnan mientras cu personal cu si tabata presente, dispuesto pa aclaria e berdad te awe no ta haya ningun atencion? Esaki ta un frustracion grandi reinando entre e trahadonan.
Tin indicacionnan fuerte cu e ex hefe di seccion hunto cu su assistent prima di minister Bikker ta buscando forma pa yega na posicion.
No tin claridad pa e trahadonan di e departamento aki riba e rumbo di dicho departamento. A purba busca comunicacion cu diferente sindicato pero aparentemente tur ta silencia dor di e mandatario, esaki ta e sentimento cu ta reina despues cu minister Bikker a cancela reunion cu trahadonan di Iasa mientras tras di nan lomba a sinta na mesa cu sindicatonan y te awe no a tende nada ni di sindicato ni di minister Bikker.
Acusacionnan falso no solamente a trece sr Matos den luz negativo, pero tambe a trece problema den seno familiar di hopi trahado y esaki sigur ta inaceptabel.
