Ayeratardi a tuma lugar firmamento oficial di e cafe cu pronto lo tin su apertura den Nicolaas
Store: ‘Mundi’s Health Cafe’, di e forma aki Gobierno di Aruba ta mustra cu ta sostene
continuidad di e vision cu tin, pa desaroya San Nicolas den un ciudad di herencia y cultura.
Mester gradici coleganan di Cultura Minister Xiomara Ruiz – Maduro y tambe Minister Dangui Oduber encarga cu Turismo, a combersa cu ambos cu lamentablemente pa motibo di otro compromisonan no por tabata presente na e firmamento. Ambos colega Minister sigur ta sostene e continuidad di trabou y vision cu a pone dilanti pa San Nicolas pa loke ta desaroyo turistico, economico y cultural den e area aki. Pa cual infrastructuralmente nos lo sigui desaroya e area aki tambe pa logra e meta cu nos a pone nos dilanti, Minister Otmar Oduber a splica. Cu e firmamento oficial cu a tuma luga, Tristan Nedd un hoben di 22 aña, ta pone un reto nobo su dilanti como entrepreneur hoben di pariba di nos isla.
Tristan a dicidi di pone su confiansa den su bario, algo cu ta tuma hopi curashi. Fundacion Museo Arubano (FMA) a keda busca te ora cu a logra haya e persona adecua cu e amor y curason unda cu e mester ta den e aspecto cultural pa su districto, cual a conoduci na e hoben cu a tuma e reto pa haci e cafe di Nicolaas Store posibel. E ocasion aki ta muestra cu Gobierno di Aruba ta kere den e proyecto y vision cu a inicia cu ne na San Nicolas, cual kisas pueblo a haya e impresion cu a keda paralisa pa 1 aña. Sinembargo e diferente fundacionnan y grupo di trabou cu tabatin pa sigui haci di San Nicolas un Cultural and Heritage City, ta e motibo cu e momento unico aki por a tuma luga. E firmamento a tuma luga den presencia di director di FMA sra. Anky Vrolijk, presidente sr. Lincoln Gomez, Minister Otmar Oduber, empleadonan di FMA y e hoben Tristan Nedd. Gobierno di Aruba ta felicita Tristan y ta dune hopi bon deseo y exito cu e reto nobo cu tin su dilanti.
