Dentista Marsman a trece dos aña pasa e noticia cu di un dentista for di Canada, cu e no ta un ortodontista. El a logra registra como un specialista y a traha varios aña aki na Aruba y cobra prijs di specialista.
Hendrik Marsman, dentista, a indica cu hopi a kere cu su persona ta loco, tabata tin envidia etc., pero tur sa awor cu su persona tabata tin rason y e tabata un scandal pa Aruba. Pero nunca a tende for di gobierno kico a bay robes y con esaki lo no por pasa mas of tin cabes a lora na DVG.
Tambe algun luna pasa e dentista a denuncia un tecnico dental, cu a haya permiso pa traha den boca di hende sin base di ley. “Tin dentista colega di mi cu tin potret saca di vulling cu el a pone den boca di pashent y cobra gewoon cuater pa seis biaha e prijs normal di dentista. Ta DVG ta parti diploma y ainda e hefe aki ta na cabes di DVG.”
Tin carta a bay Inspectie Volksgezondheid Aruba (IVA) di dentista cu ta haci fraude cu declaracion cu AZV, ta cobra sin cu pashent a presenta. Tin casa di dentista, cu no tin papel y ta traha den boca di pashent. No ta haci nada, e pashent ta confia riba e jas blanco ta e tristo realidad. AZV mester bay investiga den cobramento ilicito y pone un maximo pa cada dentista pa frena e robo aki. E ta fondo publico y no por acepta cu un ta cobra te 700 mil pa aña.
E dentista a trece dilanti otro herencia di pasado cu ta existi te awe. E ta un situacion dificil unda un gobierno mester coregi su foutnan di pasado. Tin fuerte indicacion cu tin dos dentista ta traha como ortodontista aki na Aruba y cu nan certificado ta cuestionabel. Supuestamente nan ta riba prueba den e ARUBIG, esta un sorto di “visitatie traject”. Pero echo ta, cu si ta asina, cu ta tres dentista a traha na Aruba como specialista di beugel. Pues ta traha y cobra como specialista sin cu nan tin e studio universitario como ortodontista.
Awor, tin professor na DVG cu ta evalua e capacidad di e dentista como ortodontista? Ta con e “visitatie project” ey ta hinca den otro y mas importante, pakico nan a haya esey? Ta dentista basico nan ta anto? Si ta esey, laga nan traha como dentista anto.
Tur esaki awor ta den man di gobierno pa trece claridad. Claridad na tur dentista na Aruba, e pueblo y e seguronan priva y AZV. E dentistanan na Aruba ta man na cabes na unda por manda pashent pa beugel. E calidad cu ta ofreci actual ta laga di desea.
Aki por wak un potret di un pashent di diesseis aña cu tin tres aña cu beugel. AZV y e mama a paga tur e tratamento. E pashent su cara a deforma, e bite a habri mas ainda y e ariba y abao no ta pega bon riba otro. E tin problema cu guli y ta hala rosea door di su boca. Marsman kier sa con e mucha aki por bay kauw su cuminda bon. Tin problema pa presenta asina den bida social, por ehempel awor como teenager pa invita un persona sali cu ne.
Esaki ta cay den e categoria di mal practica severo y a deforma e pashent su cara y door cu e tratamento a dura mas cu tres aña, e ta perdiendo raiz di djente. E pashent aki lo falta diesdos luna ainda di tratamento y si kier drecha e cara/mordi completo e mester opera su cacumbein (kaak). Mester a inform’e desde un inicio.
Un hende mester habri boca pa stop esaki di pasa, e muchanan no por defende nan mes, mientras e mayornan ta confia un specialista cu sa kico e ta haci. Ta imposibel cu e calidad mester ta controla door di e mayornan cu no a studia pa esaki. Ken ta para responsabel p’e daño na e mucha aki? Ken ta bay paga awor e operacion di cacumbein?
AZV y gobierno cu ta tolera esaki door di laga e “specialistanan” aki sigui traha cu contract? Esaki ta trabou di un “specialista” aki na Aruba. “Mi ta denuncia esaki publicamente pasobra e indicacion ta parce cu ta un dentista cu no sa su limite y gobierno ta lag’e traha aki como specialista”, el a expresa.
E pregunta awor ta: Kico abo como mayor lo haci si bo haya sa di e trato cu bo yiu a haya den tres aña, despues di a paga seis pa shete mil florin y cu mester sigui nuebe pa diesdos luna y un operacion na Hulanda? “Ami no sa e contesta mesora”, el a indica.
E ta un cos hopi lamentabel y mester mira den direccion di tanto DVG como gobierno y tambe AZV primeramente.
Kawaiaha a laga traha cinco pa seis aña sin studio universitario y kico e visitatie traject aki ta pa aparentemente e otro dos cu awor tambe tin hopi aña a traha aki? Ta bay laga nan traha como dentista basico awor? Ta bay cera nan practica?
Of DVG ta parti diploma di universidad como ortodontista? Ta parce e caminda aki ta canando cu entre otro e resultado cu ta wak aki riba e potret. E pashent a presenta na su consultorio cu pregunta riba su tratamento y aki dos specialista (cu BIG y Arubig y studio universitario como ortodontista) a wak e hunto cu su persona.
Pero, Marsman cu no tin miedo pa presenta den prensa, y ta bati alarma. E ta boga pa un cambio na bienestar di e pueblo. No por yega na un resultado asina despues di tres aña y a paga mas cu 6500 florin.
