Durante e conferencia di prensa di dia 7 di juni 2023 riba e tema di “BBO na frontera”, e gremionan comercial a tuma nota di declaracion di Prome Minister, mr. Evelyn Wever-Croes cu a duna di compronde cu tur e gremionan a apoya y a firma e rapport ‘Level Playing Field’.
Cu esaki, Herrick Henriquez, di ATIA na nomber di tur e gremionan kier clarifica cu e declaracion duna no ta corecto. E gremionan a apoya e “Documento di declaracion” (adhunto 1), pero nan ta nenga di a apoya e rapport final pa varios motibo cual e gremionan a trece padilanti durante e reunion cu e stakeholdernan y cu e Presidente di Camara di Comercio di e tempo ey.
E rapport manda pa Gobierno door di Camara di Comercio, a inclui e pagina firma di e “Declaracion” door di Camara di Comercio. Sin embargo, e firmanan aki no tabata den apoyo di e contenido di e rapport “Level Playing Field”. A inclui e pagina di firma di e carta den e rapport, sin permiso di e firmantenan.
Na fabor di transparencia y colaboracion, e gremionan ta keda na disposicion pa cualkier aclaracion adicional cu ta necesario.
