Un caso basta serio y inusual a tuma luga na Noord. Un empleado y un cliente a drenta den un discucion formal cu a caba na agresion cu arma blanco.
Segun informacion na sitio, e personal di e establecimento, situa den area di stadion Frans Figaroa, lo a drenta den cushina y pasa man pa un of otro obheto skerpi, ta pensa cu ta trata di un cuchiu y cu esaki agredi e cliente cu a resulta herida. Na prome instante a papia di un hincamento pero na yegada a bin constata cu e hinca mas bien tabata un corta y afortunadamento no di gravedad.
Presencia di polis tabata al instante y den diferente team entre otro mobiele eenheid, cu a bin atende cu e caso serio di agresion aki. Ambos partido ta hende muher, a componde tambe cu lo tabatin un pelea entre nan y cu na final un persona (cliente) lo ta esun cu resulta herida.
Na final dos persona a keda deteni, transporta pa warda di polis y asina husticia bay atende cu nan.
