Hapon a desactiva su alerta maximo pa tsunami, emiti dialuna despues di un serie di teremoto, pero a pidi e poblacion di zonanan di costa pa no bolbe nan cas debi na menasa di olanan grandi cu por ta mortal.
Un temblor di 7.6 grado riba escala di Richter a golpea e area di Ishikawa dialuna, na e parti costa occidental di centro di Hapon. Esaki a causa cu inicialmente a bati alarma pa un tsunami na diferente parti di e archipielago, ademas di causa daño grandi y a laga al menos seis persona dera bou di e ruinanan.
E temblor cu a sinti hasta na Tokio, a sosode den e peninsla di Noto y inicialmente Agencia Meteorologico di Hapon (JMA) a calcula cu e temblor tabata 7.4 grado riba escala di Richter, aunke cu despues a subi esaki na 7.6. E tabata 16 kilometer di profundidad.
Imagennan pasa via di television Hapones of poni riba rednan social ta mustra e forsa grandi di e temblor y e poder destructivo di esaki.
Den e localidad di Wajima a registra e dañonan mas grandi. Den e area aki di casi 27 mil habitante, rond di 30 cas unifamiliar a sufri dañonan grandi, lagando al menos seis persona dera bou di e escombronan y un edificio di banda.
E temblor a causa un candela grandi. A registra 60 replica di e temblor y JMA a adverti cu durante e proximo siman ta probabel cu por surgi mas temblor cu ta alcance nivel 7.
A raporta 30 mil cas sin luz na Ishiwaka y otro 3600 na Niigata den mesun situacion, aunke cu autoridadnan Hapones a bisa cu al menos no a detecta ningun daño na ningun di e centralnan nuclear di e pais.
Alerta pa ola grandi
E agencia inicialmente a saca un alerta maximo di tsunami pa Ishikawa y otro y advertencia di menor nivel pa resto di e costa occidental di Honshu.
Varios ora despues a baha e alerta na tsunami regular loke ta nifica cu e olanan ainda por alcansa 10 pia.
