Minister Mike Eman hunto cu su team tabata di bishita bek na Angochi pa e ceremonia di groundbreaking di e mini cancha deportivo. Esaki tabata e prome di e seisnan cu lo wordo construi den mas o menos dos luna di tempo. E proyecto di mini cancha di futbol ta cay den bon tera, ya cu e ekipo di futbol SV Arsenal cu team di division, di damas – hopi hoben – probablemente lo bay forma ekipo di miembronan mas hoben.
Pedro Morillo, Presidente di SV Arsenal, cu orguyo a participa na e ceremonia simbolico di groundbreaking, hunto cu Prome Minister Mike Eman, unda cu e mini cancha ta wordo construi, banda di e veld grandi. “Dia cu Prome Minister Eman a informa mi cu nos ta bay haya un mini-turf, mi a keda hopi contento. Nos a cuminsa awor cu e fundeshi y dia e ta cla mi ta kere cu e lo ta hopi bunita,” Morillo hopi contento a expresa na final di e ceremonia. Con e lo wordo uza, e organisacion no a planea ainda, loke si Morillo por bisa ta cu esaki ta bay wordo uza den forma mas eficiente posibel, door di huur esaki cu scolnan den bisindario y cu otro organisacionnan. No mester lubida cu e organisacion mes tin su ekiponan di futbol cu ta bay haci bon uzo di e cancha aki. “E miembronan a reacciona hopi positivo cu nos futuro mini cancha,” el a bisa.
E mesun reaccion aki e tesorera di SV Arsenal, Erica Morillo tabatin. “Sigur nos ta hopi contento cu nos ta bay haya un mini-turf aworaki den nos bario. E ta algo hopi positivo pa nos team di damas, esun di cabayero y principalmente pa e muchanan di bario, ademas di scolnan cu por tambe por haci uzo di dje.” Awo ta haciendo uzo di e veld, cu mester wordo haci limpi, pa cual e mini-cancha a cay manera un bendicion pa e organisacion. “Nos a papia cu e miembronan riba e regalo aki y nan entusiasmo ta hopi grandi. Nan ta spera cu e por keda cla lihe pa nos hungadonan por duna un miho prestacion den tur categoria." Si tur cos bay segun schedule, e mini cancha aki lo ta completamente cla na luna di augustus, pa e por wordo inaugura.
