Mariniernan ta teniendo nan entrenamento den vecindario di Spaans Lagoen y e ruinanan di Balashi, y esey tin un habitante preocupa.
Anochi , segun e habitante, e entrenamento a continua. Te asina leu den e area di naturalesa, tin parhanan cu ta migra ta bin Aruba y ta establece aki pa un tempo. Despues por scucha mainta tempran e desordo di armanan automatico. Un unidad di Corsou a haya permiso pa train den oranan di anochi den e area di naturalesa aki di Arikok.
E Adjudant na e sitio a indica cu nan tin permiso di kazerne na Savaneta. Na su turno e adjudant na Savaneta a bisa cu nan a haya permiso di polis y di e parkrangernan di Arikok.
Ta incomprendibel cu Arikok a duna permiso net durante di e migracion di parha y den naturalesa…
Mientras tanto e habitante a ricibi informe di e adjudant cu e entrenamento di tiro di diasabra mainta 6’or a keda cancela. Riba e potretnan adhunto por mira e matanan y tambe e restonan di municion cu a keda atras.
Update
Siguiendo e desaroyo aki di cerca, ta indica cu tur hende ta sconde tras di un ke otro acuerdo of ordo. Kazerne ta haci afspraak cu Arikok, e afdeling di lucht mobiele brigade for di Curacao ta haci e entrenamento y tin su propio leidinggevende.
Pero papiando cu e comandante na Corsou y e adjudant di kazerne na Savaneta, a dicidi e ora pa suspende henter e entrenamento.
E habitante en cuestion a combersa cu directie di Arikok y nan a indica cu a haci afspraak, pero a base di e habitante su experiencia, no a cumpli cu esaki.
Arikok lo bay consulta esaki cu tanto nan directiva como gobierno. Mientras tanto e habitante a tende cu esaki tambe ta riba mesa di Gobernador.
E tabata tin un otro combersacion cu e adjudant di Kazerne. Si ta bon cla cu “e armada” kier tene nan mes for di publicidad.
