Awe mainta minister Dangui Oduber a firma pa uso cannabis medicinal!

E proceso pa legalisa cannabis medicinal ta canando for di hopi tempo. Conforme nos acuerdo di gobernacion di partidonan MEP-POR-RED a acorda cu durante e periodo di gobernacion aki lo legalisa e uso di cannabis medicinal.

Minister presidente sra Wever Croes a institui un comision pa explora e posibilidadnan y tambe for di algun tempo caba minister Dangui Oduber ta trahando riba esaki. Despues di un periodo di haci tur e preparacionan necesario e momento a yega cu por cuminsa e proceso oficial pa e legalisacion di e uso di cannabis medicinal.

Awe minister Dangui Oduber a firma pa e proceso cuminsa pa entrante 2020 tur e productonan cannabis medicinal ta assesibel pa communidad.Sigur esaki ta otro logro di nos gobierno considerando e hecho cu nunca antes a haci esaki. Un gran cantidad di persona ta haci uso di cannabis medicinal pa nan salud y ta importante cu awor ta legalisa esaki. Minister Oduber a haci peticion na departamento huridico pa traha riba e decreto ministerial pa di e forma aki e importacion di e productonan di cannabis medicinal wordo legalisa.
Nos ta enfatisa cu ta trata solamente di legalisacion di uso medicinal y no rercreacional.