Minister Plenipotenciario Guilfred Besaril a tuma nota di e sentencia di hues tocante Desiree Croes y a laga su acesornan huridico repasa e sentencia aki, prome cu nan a bay dilanti y papia di dje.
Prome Minister sra. Evelyn Wever-Croes a duna un declaracion cortico riba e sentencia aki, cual e sr. Besaril a confirma:
“Den e sentencia bo ta mira cu nan ta bisa Gobierno cu e desicion cu nos a tuma di pone na DPS no ta corecto, pues e ta stop e desicion ey di Gobierno y e ta bise den e mesun sentencia ey cu e ta keda cobra e salario di directeur den e caso aki, pero e no ta dune’le derecho pa ocupa e posicion di directeur di Arubahuis manera ta menciona den e vonis y si e kier ocupa e posicion di directeur di Arubahuis anto e ora ey, e mester cuminsa un otro caso”.
Segun Minister Besaril e caso ey, sigur no lo bay ta fructifero pa e señora encuestion, pasobra un director di Arubahuis mester ta un persona di confiansa pa e Minister Plenipotenciario, e mester ta su man drechi. Minister Plenipotenciario a pone bon cla, cu tanten cu su persona ta Minister Plenipoternciario na Arubahuis, e persona aki no ta bon bini na Arubahuis mucho menos e ta bon bini pa pasa ocupa e oficina di directeur di Arubahuis.
E minister a bisa: “E como un persona inteligente, ta compronde esaki tambe y na final ami ta kere den mi curason cu e caso aki tabata netamente pa ela mantene un entrada y mayan ta pueblo lo dicidi si e ta continua na ricibi e entrada aki of cu nan ta sinti cu e entrada aki ta inhusto”.
Minister Besaril a indica cu ainda e parti huridico no ta cla, pasobra ta di cuestiona cu ta duna e señora previlegio di keda mantene e salario ey a base di un landsbesluit, a base di algo cu nunca antes a sosode den historia di Aruba.
“Semper tabata asina aki cu e directeurnan di Arubahuis desde 1986 ta bin y bay cu e Gevolmachtigde Ministernan. Esaki ta un situacion masha particular, e landsbesluit aki ta di cuestiona. Na e momentonan aki e señora lo keda cobra su salario, pero esey no ta nifica cu e parti huridico a caba, Prome Minister lo sigui deal cu e asunto di e señora en cuestion.
Pa loke ta trata e Directie di Arubahuis, no por keda sin un director den e periodo aki cu ta bay reorganisa. E reorganisacion aki ta pa Arubahuis por cuminsa funciona mas como un embahada y menos como un organisacion administrativo. Den cuadro di e reorganisacion cu lo cuminsa februari proximo, e Minister Plenipotenciario tabata tin combersacionnan caba cu e Departamento di Recursonan Humano pa asina nan cuminsa cu tur e trabounan cu mester wordo eherce relaciona cu e reorganisacion.
E Minister a informa tocante e persona cu lo ocupa e puesto aki na Aruba huis; “Den e periodo aki di transicion, a apunta un director Ad Interim, cu ta señor Glen Lin, un hurista cu a traha hopi aña den e departamento di Luchtvaart.” Un hurista cu a termina su estudio huridico algun aña atrás, Cum Laude. Segun e Minister, un persona hopi serio y un persona cu e Minister conoce desde hoben y sigur un persona cu lo sa di eherce su trabou cu hopi dinamismo y ta hopi responsabel”.
