Na november aña pasa, Grant Thornton Aruba (GT) a expande nan servicio riba e tema di combatimento di financiamento di terorismo y riba e parti di “money laundering”. Segun Edsel Lopez, partner di Grant Thornton Aruba, mirando pregunta cu nan ta haya di nan clientenan, tambe e pregunta mas specifico, con pa implementa locual cu ta para den manual di Banco Central, con pa interpreta e rekisitonan cu tin di haber cu combati labamento di placa y combatimento di financiamento di actonan terorista, a haya importante pa bin cu e siguiente paso pa organisa algun webinars. E webinars lo ta specificamente pa e grupo cu ta duna servicionan no financiero designa, “designated non-financial institutions”, manera car dealers, joyeria, casino, abogado y notarionan.
E meta ta pa bin cu webinars, specialmente pa e tipo di organisacionnan aki. Den e webinarnan aki Grant Thornton ta duna informacion con e organisacionnan aki por yega na un nivel cu nan por cumpli cu e ley di Banco Central y cumpli cu e manual cu ta vigente desde 1 di januari 2020.
Segun Licenne Boekhoudt, consultant, a haya un bon acogida pa nan servicionan di AML/CFT. A base di esaki a dicidi di organisa diferente webinar informativo pa cada grupo di “designated non-financial institutions”.
Lo enfoca riba e ley di AML/CFT y tambe lo enfoca riba e rekisitonan cu ta di importancia pa cada un di e gruponan aki. Tambe lo splica con Grant Thornton Aruba por yuda e grupo aki pa cumpli cu ley di AML/CFT. E webinarnan informativo aki, ta tuma luga den e prome y di dos siman di februari y ta totalmente gratis.
Pa mas informacion por sigui Grant Thornton riba nan rednan social con pa registra pa esaki. Ta invita tur institucion no financiero designa pa forma parti di e webinarnan aki. E dia nan lo ta lo siguiente: 2 februari – notarionan, 3 di februari – casinos y 4 di februari abogado. E siguiente siman dia 9 di februari e webinar lo ta pa e joyerianan, 10 di februari pa e comerciante nan di auto, boto y avion y por ultimo dia 11 di februari e grupo di real estate.
Shelby Maduro, senior manager, a menciona cu Grant Thornton ta ofrece diferente servicio riba AML/CFT. Den esaki por yuda cu locual ta yama e “business risk assesment” y “customer risk assesment”. Tambe por yuda organisacionnan formula nan strategia tocante AML/CFT, polisa y e manual di procedura unda cu ta splica tur e diferente proceduranan cu mester implementa den e organisacion pa asina aki cumpli cu e ley di AML/CFT.
Tambe ta asisti companianan na momento di mira e sistema cu tin den uzo, ora cu ta bay acepta un cliente. Loke ley ta yama un “Client Due Diligence”. Den e caso aki Grant Thornton ta yuda pa evalua esaki y mehora na unda cu lo mester. Grant Thornton ta ehecuta tambe un analisis y un evaluacion independiente. Ta wak e ora e strategia, proceduranan y polisa. A base di esaki por formula recomendacionnan pa trece mehoracion den e organisacion.
Un parti importante, na momento cu ta trata anti-money laundering, ley ta bisa cu e empleadonan mester ta consciente di esaki. Nan mester por identifica, mitiga y tambe mira kico ta e risiconan ta pa e compania ariba e tereno di AML/CFT. E empleadonan tambe mester ta na altura di e ley aki y tambe e strategia y manual pa bay om cu ALM/CFT. Grant Thornton por yuda unda cu por haci un training pa asina aki e empleadonan tambe ta na altura di esaki.
Un di e tareanan di e regulado ta pa haci inspeccion na tur e institutonan cu ta cay bao di nan supervision. Den e caso aki e ora GT por asisti e organisacionnan pa prepara pa e inspeccion aki di e regulado. Despues di inspeccion, e regulado normalmente ta bin cu diferente punto di atencion cu abo como organisacion tin cu implementa pa mehora e sistema di AML/CFT. E ora GT den e caso aki por yuda cu un plan di remediacion pa asina aki mehora e sistema interno di AML/CFT y yuda tambe cu implementacion di esaki.
Naturalmente GT ta contento di por ofrece e webinarnan pa e institucionnan no financiero designa, cu ta cay bao di e supervision di e regulado den februari, pa asina aki hunto engrandece e conocemento di AML/CFT na Aruba. Cumpliendo cu e ley di AML/CFT ta un responsabilidad di nos tur.
