Director di Union Caribe NV, Roberto Gracia, ta conta cu el a funda e empresa 23 aña pasa hunto cu su casa. Como un empresario experto den mercado di transferencia di placa, el a papia riba e retonan di manda placa pa famia den tempo di coronavirus.
Roberto Gracia a comenta cu aña 2020 a cuminsa bon, y hasta miho en comparacion cu januari y februari 2019, te ora cu debi na pandemia e cierre di e isla a afecta masha hopi e mercado di transferencia di placa. Mayoria di nan clientenan ta obreronan di construccion, trahadonan di sector turismo. Kico cu pasa cu e trahadonan aki e lo afecta e transferencia di placa cu normalmente nan ta haci. Si nan tabata manda placa dos biaha pa luna, awo ta haci esaki un biaha so. Y si nan tabata manda 300 dollar, awo loke ta bay ta 200 dollar. Gracia a splica cu e mandamento di placa ta 25 pa 30 porciento menos compara cu 2019.
El a recorda cu apesar e placa ta di cada trahado, tin leynan con por manda placa of con placa por drenta Aruba.
Gobierno tambe kier restringi e salida di dollarnan pa mantene stabilidad den e economia. “Antes cu yegada di turistanan nos tabatin hopi dollar ta circula den e economia, pero awo e ta hopi menos y Banco Central ta protege e florin pa cuida e economia.”
For di juli aña pasa tin restriccionnan pa transferencianan di placa, y remesa familiar a keda limita na 2 mil florin. Antes e top tabata 5 mil florin diariamente; tin restriccionnan. Esey ta motibo cu tin hendenan cu ta trata di saca placa di forma inoficial na aeropuerto. Awo no por saca cantidad grandi di placa mas di e pais, pasobra e salida di capital ta afecta e pais. “E hendenan mester tin pasenshi. Hunto pasa den e crisis, pasobra si e situacion afecta aruba, e ta afecta nos tur. P’esey nos tur tin cu colabora pa sali hunto di e situacion di crisis aki.” Esaki e CEO di Union Caribe, Roberto Gracia a splica.
