Durante un conferencia di prensa a anuncia un evento grandi cu lo tuma luga dia 20 di juli awo, fecha riba cual Colombia y su ciudadanonan ta celebra nan Dia di Independencia. Leu for di cas, aki na Aruba, e comunidad Colombiano tambe lo haya un celebracion special organisa pa Asociacion Amigos de Colombia hunto cu High Performance, Elite Productions, Eagle Resort y Romar Trading.
Reynold Kelly, organisado, a conta cu esaki ta un plan cu el a bin ta trahando riba dje pa basta tempo caba y awo cu e ta cay riba un diasabra, mas hopi hende lo por participa. No solamente e Colombianonan pero tambe amigonan di Colombia.
E celebracion grandi aki ta tuma luga den Harbor Arena y lo conta cu presencia di tres artista internacional. Lo trece un cantante cu su banda y mariachi cu lo haci un homenahe na Dario Gomez, kende a fayece.
E otro grupo cu lo trece for di Miami ta Los Adolescentes, kendenan tin exitonan grandi den e genero salsa.
E artista grandi pa e anochi aki lo ta Nelson Velasquez, kende despues di diesseis aña ta bolbe riba un escenario local. E ta interprete di vallenato manera “Entregame tu amor” of “Ajena”. “Nos ta contento cu Nelson Velasquez a scoge pa celebra 20 de julio aki na Aruba.”
Lo tin artista local manera Andrew, DJ Sky y Shine Music.
Desde 29 di maart awo entradanna lo ta disponibel (5970113). Mesa VIP dilanti a bay por completo caba.
E concierto aki ta posibel cu ayudo di e compania nacional Romar Trading. Su representante Beto Wernet tabata presente y a conta cu nan producto Old Parr cu ta masha conoci na Colombia tambe lo ta den e concierto aki. “Nos ta orguyoso di por ta presente durante e celebracion pa e pueblo Colombiano. Nos ta orguyoso di ta parti di un evento aki.”
Tipo di evento asina, grandi, no por tuma luga sin apoyo di companianan local, manera Eagle Resort, cu lo bira e cas di e artistanan durante e dianan ey, segun Janeth Agunbero, Marketing Eagle/Doubledown. El a pidi pa keda pendiente pa campañanan cu lo anuncia riba rednan social den cuadro di e celebracion di 20 di juli.
Sidney Simoons (Sidsim) di Shine Music tambe tabata den e conferencia di prensa. Sidsim ta forma parti di e frontline di Shine Music, cual banda tin hopi experencia den concierto cu bandanan internacional. Nan ta invita henter Aruba pa bin disfruta e anochi aki, specialmente pa e toke local cu nan lo duna na e concierto.
