E siman aki a batisa uniform nobo di team Good 2 Be Active. A estrena y introduci e uniform entre tur miembro presente den un ambiente di alegria na Boca Catalina, sigui pa un bunita sunset photo shooting.
Good 2 Be Active a crece durante añanan. Un team cu ta dedica nan mes pa trece conscientisacion den comunidad. Funda pa coach Fernando de Graf na aña 2009, kende ta un persona cu ta biba cu Diabetes tipo 2, cu por conta di su propio experiencia e influencia positivo di actividad fisico riba su salud. Hunto cu su team ta conscientisa e comunidad di Aruba tocante e importancia di movecion pa salud.
Good 2 Be Active ta duna e ehempel di mantene un bida activo consistente, dunando tambe guia y oportunidad na tur esnan cu seriamente kier forma parti di e team hibando e mensahe y haci deporte manera landamento, ciclismo, canamento y esun mas popular di cual nan ta conoci p’e, cu ta coremento.
Cu orguyo nan ta participa cu e biaha aki a traha conhuntamente cu “I Am Aruba” treciendo un otro proposito mas di conscientisacion. Pa esnan cu porta no conoce, I Am Aruba ta un fundacion recientemente funda na 2019 como fundacion pero ya ta existi pa algun aña caba. I Am Aruba tambe kier trece conscientisacion, pa yuda e comunidad di personanan cu problema di oido. E fundacion aki ta funda pa Sandrich Bislik, kende tambe mescos cu Fernando pa motibo di su propio experiencia, den su caso como un persona cu problema di oido, a funda I Am Aruba. E ta conta con el a keda yuda, guia door di FEPO y converti su mes den e persona exitoso cu e ta awor.
Cu un curason agradecido, kier duna bek na FEPO cu ta un fundacion casi lubida pero di suma importancia. Si abo tambe kier haci cambio den bo estilo di bida y hiba e mensahe hunto cu e organisacion. uni na Good 2 Be Active. Si bo kier aporta na FEPO pa e por sigui yuda hopi otro personanan pa sigui bay dilanti, por cumpra T-Shirt y Pechi di “I Am Aruba” y aporta na e bon causa aki. Por haya mas informacion riba nan pagina di Facebook.
Si bo wak un grupo grandi cu e color Royal Blue moviendo riba caminda, ta e team di Good 2 Be Active y I Am Aruba!
