Awe a sigui reunion cu diferente stakeholder cu formado den cuadro cu formacion di Gabinete Wever-Croes. Esunnan invita pa reuni cu formado hunto cu Partido RAIZ tabata Procurador-General, Bote ter Stege; Stichting End Child Abuse, Mijenou Tromp; Commissie Sexueel Misbruik Kinderen, Lisette Gomes; ATHA, Cindy Kelly-Mathilda y Director di Utilities, Richard Eman. E areanan cu a wordo cubri ta Husticia, Social, Labor y Energia.
Despues di e reunionnan, cada persona encarga a duna nan declaracion na prensa di e reunionnan cu a tuma luga y tambe a haya y contesta preguntanan cu tabata al caso y preguntanan adicional di prensa.
Prome Minister demisionario mr. Evelyn Wever-Croes a duna di conoce cu e reunionnan a bay bon y hopi intensivo na unda stakeholders a trece nan puntonan dilanti di loke nan ta desea pa e proximo gobierno tene cuenta cu ne. Prome Minister a expresa su satisfaccion di con tur e reunionnan a bay te cu awo y a duna di conoce cu tur punto y feedback treci, lo tene cuenta cu nan durante e siguiente gobernacion. A haci palabracion pa continua reunion cu e diferente stakeholdernan den nos comunidad una bes cu forma e gobierno.
