Departamento di Asuntonan Economico, Comercio y Industria a nota e aumento di prijs di webo na algun negoshi y a tuma contacto cu gerencia y eherce control di prijs. Un ehempel ta Price Smart unda control a mustra cu nan ta cumpli cu e prijs maximo stipula pa Gobierno.
Departamento di Asuntonan Economico, Comercio y Industria a remarca cu e prijsnan di webo importa di Merca a bira dobel y te hasta triplifica e ultimo simannan como consecuencia di e pandemia di COVID-19. Despues di Coronavirus, Merca a experencia un aumento di demanda pa e producto escencial aki.
Ta bon pa señala cu na Aruba sinembargo tin opcion, por ehempel cumpra webo local. Tabatin momento cu webo di Merca ta mas barata cu esunnan produci na Aruba mes, pero cu e aumento cu tin awendia, awo webo local ta cumbini mas.
Price Smart por ehempel ta bende caha di 30 webo, cu ta 2,5 dozijn, pa Afl. 9,45. Si cont’e pa dozijn, e lo sali Afl. 3,78. Awendia e mesun 30 webonan aki costa Afl. 19,95 cu ta nifica cu pa un dozijn el a bira Afl. 7,98. Na Aruba, por ehempel na Cunucu Mondi Fierno, nan ta bende un dozijn di webo fresco pa Afl. 5,50.
Tambe nos conoce Cunucu Aruba Dushi Tera cu ta produci webonan Pok Pok Pok. Tur esaki na miho tarifa cu e webonan di ijs procedente di Merca cu awo ta hopi mas caro cu esunnan produci localmente.
Cu e realidad aki awor riba mesa, ta importante pa nos hendenan cuminsa sostene mercado local mas. Cumpra webonan local, sostene criadonan di bestia y aporta na nos economia local, den cual placa ta keda lora na Aruba mes.
