Tur cos a cuminsa pa motibo di actuacion di un Polis hoben, asina un vocero di e bario a bisa nos ayeranochi durante un entrevista exclusivo cu 24ora.com pa mustra nan malcontento pa e forma con ta atende cu e muchanan den bario. E bario ta teme cu si Mando Policial no tuma accion pronto, cu por spera mas polarisacion y escalacion!
Kerona Johnson ta un ciudadano disgusta, procedente di e bario. E ta reconoce cu e muchanan kisas no ta esunnan di mas facil, pero ta acusa un Polis specifico di ta teima cu e muchanan y ta aplicando forsa bruto innecesariamente. Esaki ta traduciendo den rabia, disgusto y rebeldia di parti di muchanan di e bario.
Segun Johnson, esey ta precisamente locual a sosode dialuna mas trempan den Village. Ta corda tempo cu e Polisnan mas bieu di San Nicolas tabata yega den Village, cu tabatin mas respet. Nan tabata duna pa ricibi respet. E polisnan hoben aki ta yega cu un actitud y ta haci tur cos pa e hobennan di bario rabia y rebeldia pa por haya un motibo pa bay over na abuso fisico.
