Riba 17 y 18 di october 2023 a ranca sali cu e prome Foro Nacional pa Adultonan Mayor anto e minister encarga cu e cartera di Adulto Mayor, Ursell Arends, manera priminti a bini cu e di dos edicion cu a tuma luga diamars mainta na Hilton Aruba.
Riba e prome Foro, bintiseis instancia a bini hunto y firma un convenio nacional pa asina delinea kico lo ta e proximo pasonan, analisa e problemanan y propone solucionnan. Despues di e prome Foro a firma e convenio cual a bay over na reparti e instancianan den tres grupo di cual a bay traha na trece solucionnan cu gobierno di Aruba lo mester implementa. E gruponan a traha riba e tema di Active Aging, tambe nan a mira loke ta cuido na cas y na un instancia.
Diamars mainta a haya presentacion di cada un di e gruponan aki pa asina nan propone kico ta loke nan a analisa, kico ta e solucionnan cu nan ta propone pa asina gobierno por ricibi esaki pa implementacion. ‘Mi ta sumamente contento pa mira un sala di Hilton completamente yen, cu tur hende den mesun compromiso pa traha na bienestar di nos adultonan mayor.” E mandatario ta bisa cu continuidad cu ta demostrando akinan ta importante pa realmente cuminsa traha na bienestar di nos adultonan mayor manera semper mester a sosode.
NO POR HAYA PLACA SIN PLAN
Riba e parti di falta di fondo, esaki no ta un problema di ayera tampoco. E mandatario ta laga sa cu mescos cu cualkier ciudadano bo no por bay banco pidi placa sin un plan. “P’esey nos mester a traha pa yega e Scoping, pa yega na e Costing y despues Financiering. Y mi mester a bisa cu tur instancia participando a compronde esaki.” Unabes cu identifica kico ta e problemanan, kico lo bira e solucionnan proponi pa mara e gastonan na esaki, lo bay bek internamente den gobierno pa delibera con ta yega na financiamento. “Esaki ta un proceso cu bo tin cu cana, mi ta kere cu ningun hende lo fia bo placa si bo no tin un plan. Pa por yega na e fondonan mester sa kico ta e gastonan y con nos ta bay financia esaki.”
PROYECTO PASADIA
Minister Arends a anuncia e proyecto di Pasadia caminda cinco instancia ta bini hunto pa organisa diferente pasadia. Esaki lo ta casnan pa percura cu adulto mayornan ta activo den diferente area den nos barionan rond nos isla. Esaki ta un di e prome pasonan tambe pa yega na fondonan necesario segun minister Arends. “Mi ta spera cu despues di awe esaki ta bon cla pa tur hende tambe.” E mandatario ta bisa cu e comision organisando y liderando e Foro Nacional aki lo bay haya su existencia permanente pa asina sigui organisa e tipo di Foro aki regularmente pa sigui traha na bienestar di tur nos adulto mayornan cu tin mester di esaki ariba nos Isla.
