Diasabra mainta November 9, 2019, e auto di Gobernador a para na e golf course di Tierra del Sol Resort. E Honorable Sr. Alfonso Boekhoudt a ser ricibi pa e Gerente General Sr. Cisco Quant y e Presidente di Aruba Birdlife Conservation, Sr. Greg Peterson.
Hunto nan a compañe na e “Hole # 14”, cu ta e “Signature Hole” di Tierra del Sol. Sra. Natasha Silva, Gerente di Conservacion, y Sr. Gian Nunes, hefe di investigacion di Parke Nacional di Aruba y Sr. David Johnson di “Global Owl Project” a topa cunan na e “Hole # 14”, un lugar special unda e empleadonan di Golf Course y voluntarionan di Aruba Birdlife Conservation ya tabata presente.
Casi 3 aña pasa Aruba Birdlife Conservation y Parke Nacional Aruba a forma un asociacion pa rescata e Shoco di extincion. Nan a busca un socio internacional y a invita e “Global Owl Project” pa uni cu nan den nan esfuerso. Nan a traha un plan hunto y nan a aserca Cisco Quant di Tierra del Sol cu e peticion pa bira nan socio di Aruba su promo proyecto di conservacion di Shoco. E resto ta historia….
Un aspecto fundamental di e proyecto di conservacion di Shoco ta encera ofrece e Shoconan neishinan artificial cu ta poni strategicamente na lugarnan cu no ta na peliger. Durante un periodo di dos aña , 22 neishi artificial a ser poni na varios lugarnan banda di e golf course di Tierra del Sol. Y e bon noticia ta cu e Shoconan ta gusta nan neishinan artificial nobo!
E socionan a acorda cu awor ta e momento propisio pa lansa e proyecto unico aki. Tierra del Sol tabata cla pa fungi como e prome ehempel di Aruba su proyecto di conservacion di Shoco.
Nos Gobernador ta un gran amante di naturalesa cu a mustra un interes den e proyecto di conservacion di Shoco for di prome dia. Algun siman pasa, Gobernador a haci un bishita informal na Tierra del Sol pa ricibi mas informacion detaya con e progreso ta bayendo. Durante e bishita aki ela descubri cu un pareha di Shoco a muda pa “Hole # 14”.
Si, exactamente, e “Hole” mas importante di Tierra del Sol. No falta pa bisa nada cu ta e neishi artificial aki cu a ser scohi pa ta e lugar di lansamento di e proyecto.
Diasabra 9 di November 2019, e ceremonia a tuma lugar y a cuminsa cu revela un borchi nobo na golf course. Ya cu e Gobernador a descubri e Shoconan na e neishi aki e lo carga e nomber di “The Governor’s Burrow”. Pa seya e lansamento, Gobernador a pone e stand di Shoco dilanti di e neishi artificial. Y enberdad mescos cu “Hole #14”, di awor en adelante “Governor’s Burrow” tambe lo ta number 14. Nos ta agradecido na Governador di Aruba y na Tierra del Sol cu a pone nan confiansa den e socionan di Conservacion di Shoco. Nos ta gradici e empleadonan di Tiera del Sol pa nan asistencia incansable.
Aruba Birdlife Conservation ta extende e sintimentonan di aprecio na su socionan di Parke Nacional di Aruba y “The Global Owl Project” pa nan contribucion na e Conservacion di Shoco na Aruba. Un palabra di danki special na tur cu ta duna nos sosten y mas aun na nos boluntarionan fabuloso.
