Segun Luis Chong di GKMB, nan ta percura pa e puntonan debil di nos isla. Tin den barionan por ehempel hopi tireshops. Por ta restaurantnan di cuminda, supermercadonan, tambe plasnan di awa cu ta forma den nos barionan.
Tur esakinan ta cay bao di responsabilidad di GKMB. Nan ta percura pa nan wordo atendi. Tambe nan ta zorg pa bishita e casnan di anciano, como tambe e santananan cu tin rond di Aruba y tambe ta zorg, hunto cu cooperacion di scolnan, ta controla esakinan.
Gran parti di e problematica aki cu ta eyfo, cu no ta pertenece na un hende, na un cas, GKMB ta percura pa esakinan.
E unico cos cu nan ta pidi, pa cada hende cuminsa cu nan mes, na nan cas. Esey ta e parti cu falta cu ta sinti cu ta e problema mas grandi awor aki den nos comunidad.
Segun Chong, GKMB actualmente ta atendiendo cu e lugarnan cu ta warda hopi taira, of por bisa cu ta casi un dump di taira. Tin atencion pa esakinan.
Hunto cu Infrateam, DOW, Serlimar, GKMG a cuminsa cu pasonan pa atende cu casonan grandi aki.
Brainstorm
Segun Chong, internamente na GKMB, pa e parti di taira, no ta cay bao di nan responsbilidad, con pa deshaci di nan. Esaki ta cay mas bao di Directie Natuur & Milieu of Directie di Infrastructura. GKMB tin ideanan den nan departamento con pa handle cu esaki.
E unico cos cu tabata falta pa e criaderonan aki forma, tabata e awasero, segun Chong.
GKMB tabata tin tur cos cla, poni rond di cas, tur e artefactonan aki, cla pa e awasero, pa por haya e criaderonan di sangura. Normanan aceptabel di PAHO, e mester ta bao di 5%. Henter e aña aki e tabata bayendo bon te ora cu awasero a cuminsa.
E spuitmento cu nan truck, pa fumiga tur e barionan, ta un ultimo recurso cu tin den casonan di outbreak of epidemia.
Pakico esaki ta
Ora cu sali cu e trucknan aki, cu e insecticida cu nan ta spuit, ta mata solamente e adultonan cu tin por ta den cura of den nos cas. Ora cu caba di haci esaki, si e criaderonan aki no wordo elimina, su mañan of otro mañan nos tin adultonan atrobe rond di cas. Den caso cu tin un outbreak den un bario, den un districto, ta sali haci esakinan pa purba evita cu e outbreaknan aki bira mas grandi. Si no elimina e criaderonan aki, e fumigacion no lo yuda.
Si tin cu bisa, GKMB ta fumiga den e areanan di mangrove, cu ta Pos Chikito, Savaneta y tambe un parti di e area di Hotel, den cual tin cu bisa ta haya hopi yamada di nan, unda turistanan ta haya hopi molester di e sangura preto.
E sangura preto aki no ta transmiti dengue, pero si e ta un molester grandi pa e personanan cu ta biba den Pos Chikito, Savaneta, etc. Un molester grandi den temporada di yobida tambe, unda cu e sangura preto aki ta invadi tur e barionan aki, y ta ataca sin misericordia.
Boltermento no ta suficiente
Si haya awa den un tayo bao di un pochi di mata of den un hemchi y sa cu tin criadero den dje, cu tin larva den dje, si nos bolter e, solamente no ta suficiente. E webonan cu e sanguranan ta pone ta keda pega na e rand di e barinan, pega den e hemchi of scoternan di awa, nan por keda te hasta mas cu un aña viabel pa bolbe provee un larva.
Chong ta sigui splica cu si por ehempel bolter un scoter cu awa cu tabata tin webo den dje, ta ward’e y despues di un aña pon’e bek, e webonan aki lo broei. Nan ta viabel pa mas di un aña. Tin estudionan haci na Brasil cu nan por keda ma cu 400 y pico dia cu nan por toch, despues di esaki, saca un larva y un adulto por sali di un di e webonana ki.
Ta importante cu haya e criaderonan rond di nos cas, si ta artefactonan cu nos por haci limpi, haci nan limpi, pasa un spons den nan, kita tur e preto cu ta mira den nan, pa elimina e webonan aki for di den e scoternan.
