For di aña 2019 e ta sinta den e funcion di director di Korrektie Instituut Aruba (KIA). Gino Winklaar a hereda un prizon cu, manera ex-Minister Andin Bikker a bisa den un discurso, cu tabata bandona entre 2010 pa 2017. Aunke e tempo ey e mandatario tira un palabra pa ex-Minister Arthur Dowers di AVP, e tabata refleha tambe e mal maneho di Rocco Tjon na cabes di e organisacion. Den un tempo record, Winklaar bolter e panorama y a pone cosnan move. Cu KIA ta unda e mester ta? No! Pero cu el a sinta man crusa durante cuater aña tampoco ta berdad.
A logra hopi den tiki tempo
Cambionan positivo cu a tuma luga na e instituto ta entre otro e introduccion di un sistema di computer y printer nobo; A introduci digi boards pa comunica cu e personal y asina aumenta seguridad; A introduci un sistema di telefon special pa prizon. Esey no ta tur, pasobra riba su insistencia y apelacion na Gabinete Wever-Croes I, a logra aloca fondo substancial di un suma den careda di 4 miyon, pa hisa e siguridad bek den KIA y den e infrastructura.
Cu e fondonan ey a renoba varios muraya y celnan. A cambia tur lock di cel pa un sistema nobo, cu a aumenta e siguridad y a baha e chens cu un detenido lo por huy. Cu asistencia di Hulanda a pone prikkeldraad rond di e edificio y haci otro restauracion necesario.
A haci KIA mas sigur
Gino Winklaar a percura pa ekipo nobo di siguridad pa e team di IBT y BOT K9 cu ta controla celnan y ta garantisa extra siguridad ora di calamidad. A percura pa haya autonan di trabou nobo y pa autonan specialisa cu a bin te for di Hulanda. No mas cu siman pasa a logra haya mas auto pa e instituto por opera sin reto di mobilisacion.
A start proceso di reorganisacion
Dia 1 di november 2019 a logra hunto cu DRH y sindicatonan TOPA y SEPPA, pa pone e base huridico pa e reorganisacion, cu entretanto hunto cu DRH y sindicatonan ta den pleno ehecucion.
Atencion special pa hobennan
Bou guia di Gino Winklaar a move e afdeling di juegd pa duna mas atencion na e hobennan. Danki na e Sociaal Crisisplan (SCP) a logra haya extra fondo pa sportinstructeurs, un jeugdpsycholoog y docente pa brinda mas oportunidad na e hobennan cu a cay den mal caminda y ta sintando un castigo den prizon.
Mas ekipo = miho control
Despues di hopi keho cu, no obstante control cu toch articulo prohibi ta drenta prizon, a laga instala un scanner nobo pa detecta obhetonan scondi. Den cuadro di e pandemia a introduci Telejustice pa por hiba cierto procedura di casonan penal via sistema online di comunicacion via video. Den cuadro di e pandemia tambe a introduci bishita digital.
Papiando di pandemia, Gino Winklaar a logra, hunto cu su team, pa surpasa tur reto y toch logra contene e pandemia y pa e no a afecta detenidonan.
Hulanda a elogia trabou di Gino Winklaar
Pero loke e por ta mas orguyoso di dje ta di e rapport di Inspectie di Justitie en Veiligheid di Hulanda di maart 2020, unda cu despues di basta aña KIA a logra haya un rapport relativamente positivo. E rapport, tumando varios desaroyo postivo, ta menciona entre otro na final: ’Met het enthousiasme en de betrokkenheid van het huidige managementteam, een gedreven en betrokken minister van Justitie en, last but not least, een ‘pocket’ vol met plannen heeft deze missie mogelijk een kans van slagen.’ Pues KIA mag ta orguyoso di nan esfeurso y di e desaroyonan positivo cu hasta Hulanda ta admira y elogia!
Rocco a bula cabes di Gino
Fuentenan bon na altura den KIA a sigura cu na ningun momento Gino Winklaar a pidi su retiro of pidi pa bay Guarda nos Costa. Ta minister a bin present’e cu un decision pa instala un “management team” eyden y cu e por forma parti di dje. Cua director, cu tin tur autoridad y podee den un instituto, ta bay permiti pa reemplas’e pa un “management team”, pasobra den cierto forma e ta un “brevet van onvermogen” pa su mes! Y pio despues di tanto logro, haya bon recomendacion di ex-Minister Bikker y di Hulanda, pa awo den un forma dictatorial y cu un sentido di persecucion personal, e ex-director di KIA cu awe ta minister, ta dicidi pa hala Gino Winklaar un banda.
Otro “campeon sin corona”?
No ta conoci si e asunto lo keda te aki of si Gino Winklaar lo opta pa entama un caso legal contra Minister Rocco Tjon. Den practica bo por gana, mescos cu Richard Kramers, pero si e minister no kier bo den un funcion, ningun hues por oblig’e tampoco pues e ta duna bo rason pero bo tin cu ocupa un otro funcion.
Tres biaha a pidi su cabes si
Ora bisa “a” mester bisa “b” tambe. Di acuerdo cu nos file, ta nota cu desde cu Gino Winklaar a drenta na 2019 un aña despues caba sindicato a pidi pa su cabes. Na aña 2021 y na 2022 atrobe a tene accion y di forma ripiti a pidi pa e bay pasobra cu no por laga un polis maneha un prizon.
Tocante Gino Winklaar
Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas. Minister Andin Bikker a anuncia na juni 2019, cu a nombra Gino Winklaar como director di KIA, despues di dos aña cu Sergio Quant a maneha KIA den forma temporal ora cu Rocco Tjon a tuma retiro pa bira parlamentario. Na mei 2021, un luna prome cu eleccion, e mesun Minister Andin Bikker a entrega e decreto nacional (Landsbesluit) di e nombacion oficial na Gino Winklaar. E tempo ey e mandatario tabatin palabra di elogio so pa e forma di traha di Winklaar y a anuncia un lista di avance cu el a logra, mas ainda cu e mesun Rocco Tjon den su tempo. Kico a pasa cu despues di dos aña e mester bay, no ta conoci.
Tocante KIA
Korrectie Instituut Aruba, KIA, a muda pa su localidad na Santo di Patia na San Nicolas dia 22 di september 1990, pues casi 33 aña pasa. E prizon tin un populacion di un maximo di 300 detenido, parti den detencion preventivo, seccion di hende muhe y seccion di hubentud. Na KIA tin un gran cantidad di empleado trahando 24 ora pa dia pa garantisa siguridad y atende cu e presonan den cuadro di e periodo cu nan mester sinta nan castigo cu e meta pa coregi nan erornan y sali atrobe como miho ciudadanonan pa nos pais.
