E noticia cu tur hende tabata pendiente ta decision di parlamentario mr. Gerlien Croes. El a tuma su decision y a opta pa retira for di partido AVP.
El a manda un carta na partido AVP pa informa nan di su decision di distancia su mes for di e partido. Esaki tin di haber cu diferente factor.
“Dia 17 di mei 2017 mi a uni mi mes oficialmente como candidato na Partido AVP cu expectativanan halto y cu hopi animo pa sirbi nos pais y cu e compromiso di Partido pa rehubenese e organisacion y crea un espacio y plataforma pa e bos di un generacion nobo den politica na Aruba. Aunke e cambio aki no a refleha manera nos a pensa y spera durante e presentacion di lista di candidatura pa eleccion 2017, e resultado di votonan a mustra diferente y na fabor di hobennan. E 982 votonan cu mi a ricibi durante e eleccion aki na number 18 durante mi prome salida no tawata suficiente como votonan preferencial pa por drenta Parlamento di Aruba. Esaki no a stroba mi persona di e hecho cu mi a continua cu mi afiliacion y participacion activo den partido, formando parti no solamente como candidato, pero tambe como miembro di hunta di organisacionnan afilia na Partido manera Fundacion Digna-Lacle Herrera”, el a expresa den e carta.
Ken ta Gerlien Croes
Gerlien Luzdiane Croes a nace na Spijkenisse, Rotterdam, Hulanda dia 7 di februari 1987, loke ta nifica cu e tin 36 aña. E ta biba cu su pareha cu kende e tin dos yiu homber, Nate-Anton di nuebe aña y Terrence di shete aña. Na 2007 Croes a finalisa su studio VWO y na 2013 a gradua 2013 na Universidad di Maastricht Hulanda como Hurista den ley Internacional y ley Europeo y e ta posee e titulo di Meester in de Rechten. El a traha 2 aña den sector priva na Hulanda den e industria di gas y petroleo y na 2015 a bolbe bek Aruba cu su famia. Desde 2016 Gerlien ta fungi como Consehero di Maneho na Oficina di Relacionnan den Reino y Union Europeo. Na 2017 Gerlien a haci su entrada den politica como candidato di Partido AVP y ricibi sosten di 982 votador, mientras cu na eleccion di 25 di juni ultimo el a ricibi 1919 voto y asina bira e di dos votegetter di su partido. Pa di dos eleccion consecutive, Gerlien ta posiciona su mes como di 3 hende muher cu mas hopi voto na Aruba.
