Diabierna 30 October ultimo Universidad di Curaçao Dr. Moises Da Costa Gomez a tene su prestigioso ceremonia anual pa graduadonan di diferente facultad. Den e grupo aki tawatin nos propio yiu di teranan tambe, entre otro Gerick Aldrick Croes LL.M BEc. Croes ta un profesional cu un trayectorio academico amplio y disciplina combina riba e terenonan legal, finansa, belasting y awor riba e tereno notarial cu enfoke riba leynan corporativo.
Su formacion a cuminsa na 2008 obteniendo su Bachelors degree den Accounting and Finance for di Universidad di Aruba. El a labora desde e tempo ey como Tax Consultant na un “big four” Ernst & Young pa 5 aña y mei. Na 2016 el a bolbe inicia un estudio nobo cual tawata Arubaans Recht. Durante trayectorio di su estudio el a skirbi dos tesis uno riba e tereno penal y e otro riba e tereno fiscal. El a culmina na 2021 logrando su titulo di meester in de rechten cu dos specialisacion (profielaantekening) 1. legale rechtspraktijk y 2. fiscaal recht.
Su inversion academico no a keda te eynan. Mientrastanto den 2022 el a haci su entrada den e mundo notarial den e rol di “vennootschapsjurist” (corporate lawyer) na notaris sr. Theodore Johnson su practica cual awendia ta Johson – De Nobrega Notary Services. A tum’e den servicio pa su potencial como un profesional cu formacion academico amplio riba disciplina di finansa, ley y fiscalidad. Un vennootschapsjurist ta un hurista corporativo cu ta specialista riba Burgerlijk Wetboek 2 (Codigo Civil)
Bou di e guai di notaris mr. Theodore Johnson y kandidaat-notaris mr. Cyrielle de Nobrega el a haya motivacion y a encurash’e pa sigui inverti den su formacion academico como profesional. A rais di esaki Croes a cuminsa cu su estudio di Master Notarieel Recht cual ta un estudio nobo via Universidad di Corsou.
E nivel di specialisacion ta bay mas profundo den materianan manera Vennootschapsrecht, huwelijksvermogensrecht, privaatrecht, diferente leynan fiscal y erfrecht. A finalisa e estudio aki specialisando su mes riba leynan corporativo cu un tesis titula “Responsabilidad di Comisarionan den compania estatal”, asina obteniendo e titulo di Master of Notarial Law. E contenido di e tesis den liña grandi ta indica entre otro cu mester por papia di “onbehoorlijk bestuur” prome cu por bay over na determina “onbehoorlijk toezicht”. Pero los di esey e investigacion ta mustra cu supervision por bay hopi leu (riba temanan of aspectonan no rutinario) y tambe por bay hopi profundo den cifranan y administracion di e compania.
E mensahe di Croes na tur persona ta pa traha duro pa por logra bo metanan. Bida riba su mes ta dificil y cu hopi reto diario cu tin biaha por pone bo perde focus. Tin biaha tambe bo ta topa personanan den bo bida cu sea tin mal influencia, ta negativo of tambe cu kier destrui bo imagen, desacredita bo. Bo no mester lubida di unda bo a bin, con bo a wordo lanta y ki tipo di persona bo ta pasobra esey ta mucho mas importante cu loke otro por papia di bo. Riba e tipo di cosnan aki bo mester ta hopi fuerte, determina y cu un “mindset” cu “no matter what” bo lo sigui thrive. Pesey Gerick Aldrick Croes LL.M BEc su quote faborito y su mensahe pa bo ta lo siguiente:
“The world ain’t all sunshine and rainbows. It is a very mean and nasty place and it will beat you to your knees and keep you there permanently if you let it. You, me, or nobody is gonna hit as hard as life. But it ain’t how hard you hit; it’s about how hard you can get hit, and keep moving forward. How much you can take, and keep moving forward. That’s how winning is done. Now, if you know what you’re worth, then go out and get what you’re worth. But you gotta be willing to take the hit, and not pointing fingers saying you ain’t where you are because of him, or her, or anybody. Cowards do that and that ain’t you. You’re better than that!”
