Consumidornan na Aruba ta enfrenta incertidumbre tocante un posibel aumento di tarifa di awa y coriente den aña 2027. Segun informacion ricibi, WEB Aruba N.V. ainda no a logra cera un acuerdo nobo di hedging pa proteha su prijs di Heavy Fuel Oil (HFO) pa e proximo aña. E proteccion actual ta sigui te cu 31 di december 2026, mientras e referencianan internacional ta mustra un tendencia di aumento.
Actualmente, WEB ta paga US$68 pa bari, segun e informacion suministra. Hedging ta un mecanismo financiero cu ta permiti limita e impacto di fluctuacionnan di prijs di combustibel. Sin un acuerdo nobo, despues di vencemento di e proteccion actual, e costo di compra di WEB lo keda den man di e movecionnan riba mercado internacional.
E dificultad ta pa haya un momento faborabel pa cera e proteccion nobo na un prijs acepta. Cera un hedge mientras prijsnan ta halto tambe por nifica compromete e compania na un nivel di costo eleva durante e periodo di e acuerdo.
Kico ta Heavy Fuel Oil (HFO)?
Heavy Fuel Oil (HFO) ta un combustibel pisa y diki, cu consistencia parecido na teer. E ta e residuo cu ta sobra despues cu refinerianan procesa petroleo crudo y saca productonan di mas balor, manera diesel y kerosin. Tambe e ta conoci como bunker fuel of combustibel residual.
Principalmente, HFO ta uza den motornan di barconan grandi, manera tankeronan y cruceronan, pasobra e ta mas barata cu combustibelnan mas limpi. Tambe e ta uza pa genera coriente. Dependiendo di su aplicacion, ta mezcla HFO cu otro combustibel pa facilita su fluides y uzo.
Sinembargo, HFO por contene azufre, nitrogeno y metalnan manera vanadio. Ora e kima, e ta produci gasnan y particulanan cu ta contribui na contaminacion di aire y por afecta salud. Deramenan di e combustibel aki tambe ta representa un riesgo pa medio ambiente marino.
Pa limita contaminacion, industria maritimo ta uza combustibelnan cu menos azufre of sistemanan di limpiesa di gas, conoci como scrubbers. Dependiendo di e sistema, esakinan por traslada parti di e contaminacion di aire pa awa.
Prijs internacional hopi mas halto
Segun e ultimo cotisacion disponibel di diabierna 30 di oktober 2026, e promedio mundial di IFO380/HSFO, un referencia comercial pa fuel oil pisa, ta ekivalente na aproximadamente US$126 pa bari. E promedio di region di Latino America ta cerca US$114 pa bari. Na Houston e referencia ta aproximadamente US$94, na Rotterdam US$110 y na Singapore US$138 pa bari.
Compara cu e cifranan aki, e US$68 pa bari cu WEB ta pagando ta aproximadamente 46% mas abou di e promedio mundial, 40% mas abou di e promedio di Americas y 28% mas abou di Houston.
Sinembargo, e comparacion ta indicativo. No tin un solo prijs mundial pa Heavy Fuel Oil, y e referencianan di combustibel pa nabegacion no necesariamente ta identico na e producto cu WEB ta cumpra. Calidad, densidad, transporte y condicionnan di entrega ta influencia e prijs final. P’esey, e diferencia no por interpreta automaticamente como e aumento cu WEB lo mester paga ora su proteccion actual termina.
Tendencia reciente ta di aumento
E promedio mundial a subi for di aproximadamente US$122 pa bari dia 23 di october pa US$126 dia 30 di october, un aumento di cerca di 3,6% den un siman. Compara cu dia 13 di october, ora e referencia tabata rond di US$116 pa bari, e incremento ta aproximadamente 8,3%. E movecion ta indica presion creciente riba costo di combustibel den e periodo reciente, aunke esaki no ta garantisa cu prijsnan lo sigui subi den e lunanan benidero.
Posibel impacto durante e prome lunanan di aña 2027
Combustibel ta un componente importante den costo di produccion di awa y coriente na Aruba. Si WEB mester cumpra HFO na un prijs considerablemente mas halto cu e US$68 actual, esaki por pone presion riba tarifa y, consecuentemente, riba e recibo mensual di casnan y empresanan.
Segun e informacion suministra, WEB por conta cu suficiente inventario pa limita e impacto inmediato den januari 2027. Den februari y maart, ora e compania mester uza combustibel cumpra na condicionnan nobo, e efecto di prijsnan mas halto por cuminsa manifesta.
Ainda no tin un calculo confirma den e informacion disponibel di cuanto un eventual aumento di tarifa lo ta. E resultado ta depende di e prijs real di compra, inventario disponibel, un eventual acuerdo nobo di hedging y e manera cu e costonan ta incorpora den tarifa.
Pa e comunidad, e preocupacion principal ta kico lo pasa despues cu e proteccion actual termina. E prijs internacional ta actualmente riba e nivel cu WEB ta pagando, pero un subida di mercado no ta traduci automaticamente den un aumento inmediato of di mesun porcentahe den tarifa di awa y coriente.
WEB no ta cu su mannan crusa
Di acuerdo cu un ehecutivo di WEB, actualmente ta coriendo algun modelo pa mitiga e impacto. Ta conoci cu e compania awendia ta mas habri y tin hopi apetit pa explora mas energia alternativa precisamente pa baha e dependencia riba Heavy Fuel Oil pa por produci awa y coriente. Ta papia di un parke di molina mas banda di Vader Piet mes y aumenta e cantidad di panelnan solar rond di nos isla, contal cu WEB ta maneha e produccion.
WEB ta uza hopi combustibel pa dia
E prijs cu WEB lo paga pa Heavy Fuel Oil (HFO) na 2027 lo tin un impacto considerabel riba su gastonan di produccion di coriente. Segun informacion ricibi, WEB ta cumpra entre 100.000 y 150.000 bari di HFO aproximadamente cada 45 dia, mientras su consumo diario ta varia entre 3.000 y 3.400 bari. E cantidad necesario ta depende, entre otro, di cuanto energia alternativa ta disponibel riba e red: mas energia alternativo ta contribui, menos HFO WEB mester kima. Cu e volumen di consumo aki, cada aumento di un dolar den e prijs pa bari ta representa entre 3.000 y 3.400 dolar adicional pa dia, loke ta ilustra con fluctuacionnan di prijs por influencia den e costo di produccion y eventualmente den tarifa pa consumidor.
Con otro paisnan ta reaccionando
Internacionalmente, paisnan y companianan di produccion di coriente ta combina diferente medida pa limita e impacto di prijs halto di HFO y reduci nan dependencia di dje. Pa cuminsa nan ta fiha prijs of ta impone un blafon pa medio di hedging. Contractnan financiero por proteha contra aumentonan pisa. E meta ta pa por ta mas sigur di e gastonan. E no ta garantisa e prijs mas abou. Banco Mundial ta brinda asistencia na paisnan pa maneha e riesgo aki.
Tanbe, ta planifica compras y reserva di combustibel. Contractnan di suministro y reserva fisico ta yuda maneha riesgo di escasez y fluctuacion di prijs. E resultado ta depende di condicionnan di contract y capacidad di almacenamento.
Ta ora awo pa mas cu nunca nos inverti den solo, biento y bateria. Esaki ta reduci cuanto combustibel mester importa. Baterianan ta permiti incorpora mas energia renovabel den e red y limita uzo di generadornan cu ta kima combustibel.
Mester mehora eficiencia energetico door di produci y uza electricidad cu menos desperdicio. Esey ta reduci e cantidad di combustibel necesario y, consecuentemente, e exposicion na prijs internacional.
Y pa bo lubida cu mester duna sosten dirigi na hendenan vulnerabel. Pa maneha aumentonan, Banco Mundial ta señala sosten enfoca riba casnan cu mester yudansa. Esaki ta alivia e recibo, aunke e costo di combustibel mes ta keda.
Pa WEB, e cifranan ta mustra e importancia di reduci consumo: cada reduccion di 10% ta representa aproximadamente 300 te 340 bari menos pa dia, of 109.500 te 124.100 bari menos pa aña. E spaarmento financiero lo depende di e prijs pa bari y di e costo di e energia cu ta reemplasa e HFO.
