Minister Xiomara Ruiz-Maduro, encarga cu maneho di finansa, cultura y economia ta anuncia cu, basa riba desaroyonan di prijs internacional, cu ta adapta tarifa di combustibel. Entrante diaranson 13 di juni 2018, e prijs di Gasoline unleaded-premium a aumenta na 208,9 cen p/ltr. (+ 6,4 cen). Prijs di Diesel LS ta subi na 179,7 cen p/ltr. (+ 7,7 cen) y e prijs di Kerosin ta bira awor 169,1 cen p/ltr. (+ 7,0 cen). E prijsnan aki ta inclui BBO/BAZV.
Aumento di BBO/BAZV/BAVP otro luna
Tene cuenta cu entrante dia 1 di juli 2018, Gobierno di Aruba ta amplia su sistema di impuesto y en bes di BBO/BAZV na 3.5% awor lo inclui un impuesto nobo di BAVP. Pero, como cu e benta di combustibel ta bay cu 2 schakel, e prijs final na consumido na pomp di gasolin lo subi cu 5% mas, pues 2 biaha e impuesto di 2,5% di BAVP.
Desaroyo internacional menos faborabel
For di fuentenan di Departamento di Asuntonan Economico (DEZHI), nos a haya confirmacion cu e prijs di crudo internacional ta subiendo so ultimamente. Bisando esey, e expertonan cu ta verifica e tarifanan diariamente ta notando un desaroyo di aumento den prijs, cu pronosticonan cu e lo sigui aumenta, en bes di baha. Varios factor ta influencia e tendencia negativo aki pa e prijs di combustibel. Te pronostica di awor caba cu dia 11 di juli proximo, cu e prijsnanan di combustibel lo subi atrobe!
Gobierno a aumenta accijns cu 2 cen so
Na inicio di aña, Gabinete Wever-Croes, forma pa e coalicion di MEP-POR-RED a anuncia cu lo aumenta accijns (impuesto) riba combustibel cu 10 cen e aña aki. Te cu awor, Gobierno a logra aumenta e tarifa cu solamente 2 cen di e 10 cen cu a anuncia, haciendo asina cu keto bay tin un aumento di 8 cen pendiente riba e prijs di combustibel. E instruccion ta na e departamento concerni, pa aplica e aumento ora prijs di combustibel baha. Pero mirando cu ultimo lunanan e tendencia ta di subi so, no a logra aplica e impuesto adicional. Pues, si den e siguiente lunanan prijs di combustibel cuminsa baha, ainda Gobierno lo tin 8 cen na accijns pa subi riba e tarifa di gasolin, diesel y kerosin.
