Kustwacht ta bezig ta recluta muchanan nobo pa e estudio di OCPK (Opleiding Caribische Politie en Kustwachters). Vocero Shalick Clement ta haci un apelacion na tur hoben entre 18 y 23 aña, pa nan tuma informacion si nan kier bira kustwachter.
Na Aruba nan ta mas cu bon bini pa bin tuma informacion diaranson, 1 di April, na Savaneta, durante e opendag. Aki ta duna tur tipo di informacion riba e OPCK Opleiding, cu lo bay cuminsa na September awo y lo dura dos aña.
Durante di e dos añanan aki, nan lo bay tin diferente module, tarea y training pa bira un kustwachter, y durante e studio, nan ta hay’e paga tambe. Ta manera un combinacion di estudio y trabao.
Durante di e estudio, ta haya e cen paga. E estudio ta tuma luga na Corsou. Pero semper nan por bin cas bek pa bin cuminda famia.
Diaranson, dia 1 di April, durante e opendag Savaneta, tey cu tent na Kustwacht, na canto di lama, cu tur demostracion cu e botonan Metalshark y Jaguar, pa bin tuma informacion, pa nan tambe wak cu ta algo cu ta interesa nan pa nan por cuminsa cu e estudio. Tur hoben, mucha muhe y mucha homber, entre 18 y 23 aña.
Durante di e Opendag di Marinierskazerne bo por informa y solicita. Pero si bo no a haya chens pa pasa na marinierskazerne, semper Kustwacht ta alcansabel via nan website, cual ta www.kustwacht.org.
Eynan tambe nan por haya informacion tocante di e OCPK Opleiding y tambe via di nan pagina di Facebook cual ta Kustwacht. Eynan tambe por manda un mensahe. Y via di e mensahe tambe por contesta e hobennan. Semper nan por manda un email via di [email protected]. E emailadres ta un poco dificil. Ta pesey mes ta prefera acerca via di e website of via di e pagina di facebook. Eynan por haya nan mucho mas lihe. Segun Clement, ta spera cu tur hoben cu ta interesa den trabaonan di warda Costa, pa yuda nos comunidadnan, pa nos paisnan ta safe y siguridad di nos lama y costanan, pa bin tuma informacion na Savaneta, na nan tent riba tereno, pega cu e edificio di kustwacht.
Traha cu Kustwacht
Clement tin seis luna trahando pa Kustwacht den Caribe Hulandes. E ta gosando masha hopi di su trabao. E trabao ta uno cu hopi accion. E no ta un trabao di 24 ora cu bo ta sinta tras di lessenaar. Bo ta hopi pafo y riba caya. Loke ta regarda e kustwachters riba Metalshark y e Panther, entre otro pa Aruba, cu ta constantemente bezig. E kustwachters ta haci hopi deporte. E ta un trabao hopi excitante, interesante y tambe cu gran balor. E kustwachters ta hendenan cu ta bringa pa proteha nos pais. Ta un trabao hopi dushi, segun Clement.
Cuanto ta dura prome cu bira un kustwachter
Pa e personal di e parti operacional, esta e esunnan cu ta bay riba lama pa bay detene of intercepta criminalnan, ta encera e parti di e OCPK opleiding ya menciona, cu ta cuminsa na September awo. Ta un duracion di 2 aña, caminda nan ta haya module, examen, etc. Despues di e 2 añanan aki, nan ta bay nan pais bek y nan ta keda sigui tres aña e ora un training mas intensivo cu ta bira e praktijkgedeelte.
E dos añanan prome ta teoria y e otro 3 añanan ta mas practica. Nan ta subi lama, nan ta cana cu nan colega den e edificio di Kustwacht. Despues di e cinco añanan aki, e ora ey nan por solicita, si tin vacatura, pa nan haya trabao fiho. For di eynan nan por crece. Nan por bira matroos, djey matroos 1ste klasse, djey kwartier meester, etc. Nan por sigui crece den nan trabao. Sigui desaroya bira hasta comandante riba un di e botonan.
Asina cu e estudio cuminsa, e estudio ta paga. E ta manera un combinacion di trabao y estudio. Bo ta gana bo cen for di cuminsamento.
Na final
Segun bo ta crece, bo salario tambe ta crece. Dimes, kustwacht, tin nan bon condicionnan laboral pa e personal. Clement ta splica cu esey tambe ta un parti importante pa hopi hende. Ora cu bo tin un trabao y cu bo tin un bon fundeshi, esey sigur ta e caso na kustwacht, cu bo por conta cu un bon salario y un bon condicion di trabao.
