“Mi a tende boso ta insinua cu Eddie Briesen ta traha pa mi pero esey no ta berdad. E ta den un directiva di energia di Minister Glenbert Croes y e ta consehero di Minister Endy Croes, pues di mi no. Mi a pidi ambos pa sea pidi Briesen pa e mes tuma retiro sino nan lo tin cu tuma un decision al respecto”, asina minister-president mr. Evelyn Wever-Croes a contesta den un entrevista exclusivo cu 24ora.com diamars atardi, na su salida for di un reunion cu Gobernador di Aruba.
Di minister pa “top-consehero”
No ta trata di cualkier consehero, sino mas bien di e “top consehero” di Gabinete Wever-Croes II cu por lo menos dos contract “dienstverlening overeenkomst” (DVO) na Ministerio di Energia y na Ministerio di Enseñansa y Deporte, banda di su envolvimento den no menos cu tres compania of fundacion di gobierno. Den RdA e ta ocupa e funcion di presidente di cual ta pag’e, separa di e dos contract DVOnan cu e tin caba, adicionalmente un suma di por lo menos tres mil florin pa luna. Den e otro compania y fundacion ta varia tambe entre dos pa tres mil florin pa luna pa su envolvimento den e hunta di comisario of hunta di supervision. Banda di su pensioen di minister, ta haci Eddy Briesen un di e ex-ministernan di MEP miho compensa na Aruba!
Contract “gordo” na Santa Rosa riba nomber di su yiu
Pero comosifuera poco, a bin topa cu un DVO na Santa Rosa tambe di un suma cuantioso pa luna, ta papia di 30 mil florin pa luna, cu ta poni riba nomber di e yiu muhe di e ex-minister. Pa colmo e tabata consehero principal di Ministerio di Agricultura, encabesa pa Minister Chris Romero, den Gabinete Wever-Croes I. Ta acus’e di lo a “fix” su mes na momento cu a bin eleccion y cu Romero lo no regresa mas como minister. A laga un bon contract atras na LVV Santa Rosa, sin cu nunca e yiu muhe a presenta na e departamento ni pa traha ni pa conseha. Es mas, e yiu ta traha na un centro di hende grandi na Wayaca, pues no ta ni traha den gobierno!
Gabinete Wever-Croes II mes a keh’e
Esaki ta haci cu mesora, despues cu a bin cambio di asignatura, cu a topa cu e “sorpresa” aki. Conseho di Minister a opta pa, contrario con a atende cu Minister Guillfred Besaril, cu a haya chens pa paga bek loke el a malversa, aki si a bay Ministerio Publico mesora y asina laga husticia persigui e ex-mandatarionan, esta Chris Romero y Eddie Briesen. Ora mira con e ministernan awor ta bisa di a keda straña cu tin investigacion y “inval” na cas di nan top-consehero, ta straño. Pasobra e pregunta ta surgi mesora…ta ken a keh’e anto? Acaso a keh’e y lubida mesora cu ta boso colectivamente a opta pa caba cu e carera politico di Romero y cu e carera largo di Briesen, cu a sirbi e pais como parlamentario, minister y consehero di Partido MEP desde aña 1983. Na aña 2013 el a participa ultimo biaha como candidato riba lista di MEP, pues un trayecto impresionante di 30 aña activo como politico ta caba awo cu un mancha masha mahos y awo ta somet’e na investigacion y posibel condena pa malversacion cu plac’i pueblo bou gobernacion di MEP mes.
Raiz ta miho cu MEP den scoge supervisor den directivanan
Pa caba cu e forma con e gobierno aki ta reacciona, den sentido di ta sorprendi di e investigacion, ta bon pa aclaria algun decision descabeya cu nan mes a tuma. Ta asumi cu esaki ta decisionnan cu MEP mes a tuma pa complace y enrikece nan mesun hendenan. Pasobra, por tuma nota cu den e huntanan di comisario of supervision cu ta resorta bou di Partido Raiz, ta nota cu ta tene cuenta cu expertonan riba diferente tereno pa yuda e companianan. Pues ta aplica un sorto di “schets profiel” den e directivanan, cu hurista, accountant, profesionalnan den advisory, cu por controla e directornan di e companianan. Asina por mira cu asina cu Minister Geoffrey Wever a asumi su funcion y a tuma mando di SETAR, cu mesora a saca ex-pareha di Minister Romero cu tabata den directiva y tambe ex-Prome Minister Nel Oduber. Na nan luga a hinca profesionalnan cu sa di telecomunicacion, di finansa, di maneho y di ley!
Mas “super consehero” den MEP
No ta Eddie Briesn so tin tanto suerte cu e ta representa partido MEP den tres diferente Hunta di Super di Supervision den companianan estatal. Asina ta nota cu Filomeno Maduro, miho conoci como Shon No, tambe ta den directiva di NV ELMAR y den WEB NV pareu. Si ta cobra tres mil florin den cada un, anto facilmente por suma cuanto un pensionado asina, cu a duna les na scol pa hopi aña, awo ta gana extra. Separa cu, no tin mas hoben cu experticio den ramo di produccion di awa y coriente of distribucion di coriente pa controla e ingenieronan na cabes di e companianan? Gobierno (nan) ta demostra cu e hunta di comisario mas bien ta un deposito di sostenedonan di partido cu merece extra cen, en bes di un hunta serio y profesional pa por controla e companianan.
Tin mas ex-minister cu “suerte”
No ta Eddie Briesen so ta un ex-minister di MEP cu tin suerte di por ta hinca den directivanan di companianan estatal pa por cobra extra. Asina ex-Minister Nilo Swaen tambe, banda di su pensioen di minister, tambe ta cobra como consehero di Minister di Finansa y comosifuera poco, ta hinca tambe den directiva di Utilities Aruba N.V. pa asina e por hiba un “bonus” extra tur luna cas. Aunke cu el a fungi como minister den pasado, Swaen semper tabata un empleado publico y no tin suficiente experiencia den sector priva of den maneho di un compania, pa e por yuda guia Utilities Aruba N.V. Atrobe, un otro caso cla di complaciencia y pa premia esunnan hinca den e “innercircle” financieramente.
Gabinete Wever-Croes II mes a fix e bon!
Den caso di ing. Edison Briesen, e fecha di 12 di juli 2022 ta un fecha historico y sin duda algun memorabel. Riba e dia ey el a “hit the jackpot” di Gabinete Wever-Croes II pasobra den un dia el a haya un aumento di por lo menos nuebe mil florin pa luna, comokiera cu a hinc’e den tres directiva di compania estatal y fundacion liga na gobierno. Si e gobierno sinta e periodo completo, Eddie Briesen por conta cu 36 luna na nuebe mil florin cu hunto ta suma na Afl. 324.000,= riba su contractnan DVO di consehero y banda di su pensioen di minister. Ta manera cos cu el a participa den e programa “Who wants to be millionaire” di Conseho di Minister, pero cu plac’i pueblo.
Nombracion di directiva ta pasa Conseho di Minister
Con Prome Minister mr. Evelyn Wever-Croes por purba laba man di e decision descabeya y dudoso aki? El a bisa cu Briesen no ta traha p’e, anto ta bou cua minister Fundacion Futura ta resorta? Ta na ken e directiva y gerencia di e fundacion ta raporta? Ta famia di ken ta den directiva y gerencia di e fundacion anto? Ken tabata Minister di Energia den e prome gabinete anto? Conseho di Minister no tabata sa cu Briesen ta den dos directiva di compania RdA y TDEA? Pues si sa cu e tin contract pa conseha Ministernan Glenbert Croes y Endy Croes, con bin a dun’e un aumento di nuebe mil florin riba un solo dia asina? No ta despues di Conseho di Minister di diamars 12 di juli a duna ordo pa inscribie den tur e companianan aki pareu? Anto no por culpa Minister Glenbert Croes pasobra e sigur no tin nada di haber cu FUTURA, pues esaki ta demostra claramente cu ta Conseho di Minister completo a “fix” Eddie Briesen di e forma aki.
Con ta haci cu e “fixmento” den Parlamento awo?
Dentro di poco e reunion publico pa apodera Minister di Turismo Dangui Oduber pa cera un “deal” cu e compania Mericano cu a haya un contract dudoso y misterioso di ex-Minister Eddie Briesen na aña 2009, cu awor ta costa gobierno 2.1 miyon florin sino nan lo bay personalmente tras di Briesen. Pa esaki MEP mester di e sosten di Fraccion Raiz den Parlamento pa cera 11 voto pa legalisa e “baina” aki cu e minister di MEP a haci e tempo aya, sin conseho, sin presupuesto y sin cu ningun hende tabata sa. El a haci esaki despues cu MEP a perde eleccion caba y a laga pa Minister Otmar Oduber bay pega cu e “deal” aki, locual no a sosode. E ley cu awor kier pasa den Parlamento ta pa “regla” y legalisa e eror di Briesen di e tempo aya. Y obviamente un decision integro esaki lo no ta, pasobra den cierto forma e ta nifica premia mal decision y mal gobernacion na Aruba.
Tocante Eddie Briesen
Ing. Edison Briesen den pasado a ocupa un funcion den gerencia di Arubus. No a dura mucho cu Betico Croes a acerc’e y el a dicidi di drenta den politica.
Na aña 1983 el a participa pa prome biaha riba lista di MEP y a logra 264 voto. Den eleccion na aña 1989 el a crece te na 492 voto personal y a drenta gobernacion, despues di algun luna ora cu Minister Daniel Leo a fayece. Desde dia 15 di augustus 1989 el a huramenta como Minister di Asuntonan Economico y Turismo di Gabinete Oduber I.
Den eleccion di aña 1993 el a subi te na 656 voto pero gobierno a cay un aña despues. Den eleccion di aña 1994 el a baha te na 396 voto.
Tres aña despues, gobierno a bolbe cay y den eleccion di 1997 el a logra 537 voto personal.
Den eleccion di aña 2001, Briesen a haya 673 voto riba su nomber, ora el a bolbe bira minister.
Den eleccion di 2005, MEP a bolbe gana eleccion y el a haya 938 voto personal, su record den henter su carera.
Den eleccion di 2009, AVP a gana eleccion su so y Briesen a baha na 559 voto. Mescos te den eleccion 2013 ora AVP a crece den resultado cu su votonan a baha te na 240 voto, cu tabata e record den menos cantidad di voto den henter su carera.
Durante Gabinete Wever-Croes I na aña 2017, Briesen a bira consehero di Minister Chris Romero y awo den e di dos gabinete e ta conseha Minister Endy Croes. E tabata tambe presidente di Refineria di Aruba, TDEA NV, Fundacion FUTURA y a biaha na varios ocacion cu Minister Glenbert Croes riba misionnan di energia y refineria.
