Riba diabierna mainta tabata tin sentencia di un caso grandi cu a tuma luga aña pasa, unda cu e hoben Camilo Sosa a perde su bida. Despues cu a trata e caso aki tres siman pasa, unda cu a pidi un castigo di 12 aña, famianan a bin hunto pa scucha kico ta e sentencia.
Raquel Sosa, mama di Camilo, tabata t’ey presente, a splica cu den sala nan a duna e acusado 11 aña. Hopi di nan tabata tin t-shirt preto bisti. A keda demostra cu husticia no ta prevalence, e mama Raquel Sosa a bias. “Lamentablemente tur caminda di mundo, e corupcion, e pedofilia, e coruptonan ta triunfando. Un biaha mas nan no ta duna e sentencia merece y no ta un Ryson Paskel so tin na KIA, tin hopi Ryson Paskel eyfo, cu e mesun tata cu Ryson Paskel tin.
Un cos si tin cu bisa, pa tur yiu cu ta resenti, no ta importa locual cu bo mama haci of bo tata no a haci. Abo ta unico responsabel di bida y bo futuro. Lamentablemente tambe tin di bisa cu hopi tata cu mama nan ta apoya e sinberguensura di nan yiunan hunto cu famia. Pesey tin e consecuencia di loke ta pasando awe.”
Raquel Sosa ta pidi pa Aruba habri su wowonan, mama y tatanan habri wowo y wak boso yiunan. Nos tin cu wak con nos ta lanta nos yiu. Ora un yiu ta lanta sin amor, sin cuido den violencia, esaki ta e consecuencianan. Ainda, despues cu un yiu ta haci asina malo cu ta bira un asesino, ainda famia ta apoy’e. Esey ta di lamenta, segun e mama. Cu e propio famia di Ryson Paskel ta apoya e sinberguensura aki. Pero ley humano, el a bias, awo ta triunfa, pero esun di Dios no ta bay t’asina. Bida ta sigui, ban mira kico ta pasa na caminda. Ora bo lanta den un hogar asina horibel, manera e persona aki a lanta, no tin drechi, no tin mas drechi. Ora cu mama of tata apoya e sinberguensura aki, ta un consecuencia y pa drecha, ta dificil.
E decision di hues a cay manera un sla duro pa famia di Camilo Sosa. Su tata, Alejandro Sosa Careño, ta splica cu lamentablemente ta biba riba un isla cu husticia ta bayendo tras. Ta imposibel cu un mucha ta kita bida di un hoben di 22 aña y ta ricibi un castigo asina abao. For di momento di e hecho, na momento cu el a bira profugo di husticia, na momento cu el a burla di husticia di Aruba, na momento cu el a bay KIA y ta manda potret pa e famia y tur hende wak, e no ta mustra ningun tipo di arepentimento. Ta demostra cu loke el a haci tabata intencional y ta 11 aña so el a haya. E caso aki ta similar na uno di Colombia, caminda cu eynan si a duna 33 aña. E husticia na Aruba ta co’i hari. 11 aña ta nada. Pa destrui un famia complete, destrui amigonan completo, tur caminda. Famia Sosa no tin nan yiu mas. E tata ta spera algun dia cu husticia, no ta pasa mescos cu a pasa cu nan, cu famia di un hues of fiscal pasa den mesun situacion.
Raquel Sosa a agrega cu Aruba mester prepara. Pasobra esaki ta duna pia pa e otronan cu ta pafo comete e mesun delito y bin husticia, duna excusa, cu ta su bida, cu su mama of tata a muri. Dia cu algo pasa, Raquel Sosa tambe lo bisa cu su yiu a muri, of un di su otro yiunan tambe a muri, kico husticia tin di bisae ora, e ta puntra. Husticia no tin nada mas di bisa. Lamentablemente husticia na Aruba ta laga hopi di desea.
Tur hende ta bisa cu ta ley Hulandes. “Ken a traha ley Hulandes. Hende, humano, no ta Dios a traha ley Hulandes. Tur ley mester por kibr’e. Esun cu bo no por kibra ta husticia di Dios. Ta e unico husticia cu no por kibra. P’esey tur mucha malcria, cu nan tin pensa di haci malo, djis haci’e. Ki mas por bisa, na no ta haya hopi aña na KIA. Esey ta duna caminda pa hopi mama perde nan yiunan tambe, lamentablemente. Pidiendo Dios cu nada mas malo pasa na Aruba manera e caso di mama y tata di Camilo Sosa.”
E mayornan lo bay Ministerio Publico siguientemente pa otro siman. Cos no a caba ainda pa Raquel Sosa.
