Presidente di sindicato FTA, Hubert Dirksz tabata tey presente durante di e manifestacion contra abuso di mucha, a splica cu nan a haya peticion di parti di Yuri Bracho y a dun’e espacio pa papia cu Congreso y Congreso a duna su opinion y a haci un cantidad di pregunta.
Tur hende por reconoce cu e problema di abuso di mucha riba su mes, ta un problema serio na Aruba. Tambe e problema social ta asina grandi cu adictonan ambulante riba caya. E situacion social ta birando hopi dificil na Aruba, cu mester di atencion. Mester di bini hunto, mester pa traha riba esaki. Na final nos tur ta keda biba aki y ora cu e problema social afecta uno, ta dolor so e ta causa. Por yega un momento cu e no ta bay causa solamente directamente den famianan, pero e ta bay afecta nos calidad di bida, nos comportacion, tur na su turno tambe, ta e parti economico tambe.
E ora, segun Dirksz, decisionnan mester wordo tuma na nivel di parlamento y di gobierno, mester wordo haci awo. No mester keda pa despues. Poniendo esaki un banda, ta mas pio so e problema ta bira.
Awo ta e momento, segun prioridad, logicamente atende cu e problemanan social, cual ta hopi serio. Esaki ta un di nan hopi alarmante. No ta na su luga pa nos tolera esaki, cera wowo, pasobra e problema tey, ban atende cun’e, segun Hubert Dirksz, FTA.
