Trahadonan di De Palm Tours, hunto cu miembronan di sindicato FTA a reuni na oficina di Mediador di Gobierno caminda cu un referendum a tuma luga pa e sindicato representa e trahadonan den e compania grandi aki.
Hubert Dirksz, presidente di e sindicato a splica cu esaki ta pa un total di 58 trahado. Di e 58, 40 a haci uzo di voto. Tabata tin mester di 50% +1, cual ta 30 trahado. FTA a haya 39. Di e 40 cu a vota, un a vota invalido.
FTA ta hopi contento y ta aplaudi e expresion di e trahadonan, e lucha, e boluntad pa bira miembro di e sindicato. Pa hopi aña a purba caba. A tene un referendum algun tempo pasa pa haya e trahadonan, pero lamentablemente e trahadonan a hala atras, caminda cu na ultimo ora e referendum a bay malo y FTA a perde.
E biaha aki, segun Dirksz, e trahadonan a para duro pa FTA representa nan oficialmente. Esey a sosode diabierna caminda nan a gana e referendum. Di biaha e sindicato ta bay atende cu tur asunto cu e trahadonan tin. Sea ta pa nan problemanan di trabao, cumplimento di nan derechonan, etc. Tur e sindicato ta bay atende.
Sa cu ta den un momento dificil, asina mes mester hinca un CAO den otro, pa asina entrega na compania, pa e por bira algo cu por negosha pa e trahadonan.
FTA a yega di reuni un biaha cu e trahadonan. Por a ripara cu hopi punto relaciona cu custumber of ley, no tin claridad cerca e trahadonan. Tambe tin hopi duda si e compania ta cumpli cu e leynan di labor manera mester ta. Ta algo cu tin cu wak di cerca cu e derecho di trahado segun leynan di Aruba mester ta respeta.
De Palm Tours mes ta un compania grandi y un parti a uni na e sindicato. Si e otro parti haya sa cu no tin problema pa ta miembro di e sindicato, cu por atende nan problema cu tur trankilidad, tur e otro trahadonan tambe logicamente porta ta habri pa nan por bira miembro di e sindicato.
Pa loke ta otro companianan, Dirksz a menciona cu ainda tin pendiente dos referendum mas di companianan chikito cu ta den tapara.
