E medida tuma diahuebs door di Instituto Nacional di Aeronautica Civil Venezolano, ta aumenta e accionnan tuma den luna di januari ora cu a para tur e vuelonan pa e islanan di Corsou, Boneiro y Aruba, cu excepción di esnan cu solamente tabata pasa di transito pa e islanan of cu tabata transporta personanan di nacionalidad Hulandes. Di awor en adelanta, a elimina tur e excepcionnan y a implementa un blokeo total entre Venezuela y e tres islanan.
E comunicado manda diaranson pa tur e aerolineanan cu a bin ta brindando servicionan den transito entre Venezuela y e islanan, ta indica cu e medida ta wordo amplia te cu proximo aviso.
Tambe e ta inclui e vuelonan cu tin di haber cu carga y post, loke ta wordo agrega na e medidanan anterior cu ta afecta tur loke cu tin di haber cu e comunicacionnan maritimo, priva y comercial.
Esaki a trece como consecuencia cu den curso di awe tin un grupo grandi di pasaheronan pega na Miami y cu mester a wordo traslada pa Venezuela, haciendo escala na Aruba.
Ta sperando cu pronto e aerolineanan reacciona riba e decision aki.
Tabata dia 6 di januari ultimo cu Presidente Nicolas maduro a ordena cierre, pa 72 ora, di tur comunicacion y comercialisacion cu e islanan ABC y a denuncia cu na e islanan aki tin mafia cu ta encarga di bende tur tipo di rikesa cu ta wordo horta di Venezuela.
Despues dia 9 di januari, e Presidente a anuncia extension di e cierre pa 72 ora mas ta ora cu tuma luga un reunion di nivel halto cu autoridadnan di e islanan y Gobierno nacional pa yega na un plan di accion cu ta combati mafia “cu ta horta nos propiedadnan, y ta haci contrabanda sin cu nan ta wordo castiga”.
