Pa medio di un karta Frakshon di MAN ta aserká presidente di Parlamento pa aserká Kontrolaria General ku e petishon pa aselerá e proseso di investigashon riba konstrukshon di Hospital Nobo Otrobanda.
Un proyekto di e magnitut i importansia aki ta tópiko di diskushon diariamente, entre otro debí na gastunan adishonal ku ta supuestamente haltu. Esaki ta trese un mancha (inesesariamente) i interogativa riba e proyekto.
Pa Frakshon di MAN ta importante pa trese klaridat i trankilidat rondó di Hospital Nobo Otrobanda pa asina no solamente Parlamento sino pueblo di Kòrsou tambe haña tur informashon tokante Hospital Nobo Otrobanda i ku e hospital ku tantu pueblo di Kòrsou a warda riba dje por habri su portanan eksitosamente. Frakshon di MAN ta spera ku lo duna oido i honra e petishon i aserká Kontrolaria General mas pronto ku ta posibel ku e petishon pa e investigashon por kuminsá.
Alabes Frakshon di MAN lo aserká Gobièrnu di Kòrsou ku e petishon pa inisiá un investigashon forénsiko riba konstrukshon di Hospital Nobo Otrobanda.
