Lidernan cu ta traha den un Centro di Cuido y Guia di Mucha (Creche y traimerdia) ta pasa hopi tempo cu e muchanan den nan grupo.
Mirando e hecho aki, por conclui cu e lidernan tin un tarea sumamente importante y responsabilidad grandi ora ta trata cuido, guia y seguridad di nos muchanan. Tur mucha, especialmente muchanan chikito ta depende riba adultonan pa ta nan voz y pa yuda nan ora nan ta den peliger, esaki ta haci cu e lidernan tin un rol importante ora ta trata señala posibel/sospecho di abuso/negligencia di mucha.
Pa e motibo aki, Fundacion Pa Nos Muchanan hunto cu Fundacion Respeta Mi a organisa un charla pa lidernan di diferente Centro di Cuido y Guia di Mucha tocante con pa reconoce señalnan di abuso di mucha. E charla a tuma lugar diasabra, 18 di Januari 2020. E charla aki a wordo ofreci pa prome biaha na Augustus 2019, pero mirando e interes grandi di e lidernan, a dicidi pa ripiti e charla pa asina duna mas lidernan e oportunidad di participa.
Durante e charla e participantenan a ricibi informacion tocante e diferente formanan di abuso di mucha, con pa señala e diferente formanan aki di abuso, y factornan cu por conduci na abuso di mucha. E participantenan tambe a wordo siña tres (3) pasonan importante cu lo yuda nan anda cu ‘disclosure’, cual ta ora un mucha ta revela cu e la pasa den un forma di abuso. E participantenan a traha den grupo unda nan mester a aplica loke nan a siña riba un caso ficticio, y indica e pasonan cu nan como lider lo tuma acaso nan encontra un situacion di abuso. FPNM ta sumamente satisfecho di e informacion cu a wordo duna durante e charla y kier gradici Fundacion Respetami pa nan tremendo presentacion y tur e lidernan di Centronan di Cuido pa nan participacion.
