Parkeo di Playa Kenepa lo pasa den un transformashon kompleto. Ta bai traha un “turnaround” na e pareko pa krea espasio amplio pa bùsnan grandi por bira i stashoná. Tambe ta strukturá e lugánan di stashoná outo di moda ku sigur 102 vehíkulo por haña un lugá adekuá pa stashoná.
E trabounan a kuminsá resientemente i ta den man di e kontratista CWM. Te intenshon pa e trabounan ta kla pa dia 19 mart próksimo. Próksimamente bùsnan grandi lo duna e servisio di baha e pasahero te na e playa. Den kuadro di esaki, e petishon a drenta pa adaptá e sitio di stashoná outo.
E playa, konsiderá un di esnan mas bunita di Kòrsou, ta hopi bishita pa tantu hendenan lokal komo turista. Minister Jesus-Leito huntu ku Servisio di Obra Públiko, OW, ta sumamente kontentu di anunsiá kambionan grandi na e lugá di stashoná outo.
Manera komunidat por tuma nota, diferente proyekto di mantenshon di kaminda ta kontinuá. Esakinan ta entre otro mantenshon di kaminda den Soaux, drecha Esmeraldaweg, pone drèmpel òf krusada elevá na diferente sitio, i basha asfalt riba diferente kaminda di tera. Minister Zita Jesus-Leito ta hopi orguyoso di e proyektonan aki i huntu ku OW ta konta riba koperashon i sosten di tur hende pa ku realisashon di esakinan.
OW ta pidi tur outomobilista pa kore ku koutela i tene kuenta ku desviashonnan den tráfiko. Tambe ta pidi pasenshi durante ehekushon di e trabounan. Un bista di tur e proyektonan ta disponibel riba e website www.vvrp.cw/proyekto. pa mas informashon por yama òf app na 522-2480.
