Na e momento aki e fondonan di SVb ta mustrando señalnan di recuperacion, segun e director di SVb Edwin Jacobs. No a yega na unda lo kier desea di ta, cu ta fondonan cu tin bon reserva pa momento cu e economia tin menos miho tempo. Pero nos ta riba e caminda. Locual ta keda importante ta e crecemento economico. Nos fondonan mester di crecemento economico pa nan por sigui haya forsa y keda financieramente sostenibel e proximo aña. Den añanan 20, ta mira e proyeccion di e poblacion ta mustra cu lo bay dal mas fuerte. Y e momento ey mester ta prepara como comunidad pa bo por wanta e sla financiero cu ta bay bin door di e embehecemento aki.

Edad di Pensioen

E ley cu tin awor aki na vigor ta menciona cu edad di pensioen ta aumenta cada aña cu mey aña. E aña aki e ta na 61 aña y mey y entrante otro aña na 62 aña. Pa 2024, segun e ley actual ta poni pa e yega 65 aña.

Bahamento of no

SVB tabata basta critico y ta den recuperacion keto bay. Segun Jacobs, cada edad di pensioen tin su prijs. Como consehero di gobierno semper SVB lo indica na Gobierno kico ta e gastonan cu cada edad ta representa y posibilidadnan pa financia esaki tambe. Na final e decision riba kico como pais por carga, ta un decision politico cu ta wordo tuma e ora na nivel politico. Tambe den cooperacion cu e partnernan social y tin cu wak’e den un contexto cu ta solamente di e fondonan. E tin di haci cu gastonan colectivo y tin cu wak’e den henter e cuadro di henter e gasto colectivo pa nos economia. No ta un materia facil, pero ta ehercisionan cu tin cu wordo haci pa bo por haya un indicacion di kico ta e prijs cu ta mara na cierto edad di pensioen.