Recientemente “International Bank Note Society”, estableci desde aña 1961, a anuncia su tradicional “IBNS Banknote of the Year Award” den cual ta reconoce e biyetenan excepcional emiti den e aña ey. Pa e aña aki ya caba a nomina tres placa di papel; E biyete di 5 pound di Irlanda, e 1000 Franc di Suisa y e biyete di 25 florin di Aruba!
Pa por nomina un biyete specifico, e mester a sali caba riba mercado pa publico den e aña di e premio, pues den e caso di Aruba, na luna di juni a emiti e edicion nobo aki. Tambe e placa di papel mester tin merito artistico y innovacion den caracteristica di siguridad y mester ta den circulacion general. Ora di nomina un biyete, ta pidi pa inclui e motibonan cu ta haci’e diferente y miho cu otronan.
E organisadonan a informa cu por nomina tur placa di papel di e aña aki te cu dia 31 di januari 2020. Asina cu tin tur nominacion aden, lo saca e biyete ganado a base di votacion entre e miembronan di IBNS. Lo tene considera aspectonan manera merito artistico, diseño, uzo di color, contrast, balans y caracteristica di siguridad.
Ta bon pa informa cu den e premio di aña 2018, a selecciona Bank of Canada pa ricibi e prestigioso “Bank Note of the Year Award 2018”. E cara di e placa di papel aki tin e icono di husticia social Viola Desmond mientras cu patras tin e museo di Canada pa derechonan humano na Winnipeg, na Manitoba. E placa di papel aki di 10 dollar ta imprimi na Canadian Bank Note, cu ta e mesun compania cu ta encarga pa maneha y opera Lotto pa Deporte na Aruba. Un di e aspectonan cu mas a hunga un rol den e decision pa selecciona e biyete di 10 dollar Canades ta e caracteristicanan moderno di siguridad cu el a bin cune. E biyete ta masha dificil mes pa falsifica.
Pa loke ta e placa di papel di 25 florin di Aruba cu awor ta nomina pa gana e premio internacional aki, ta asina cu a dura 7 aña pa por a cuminsa y caba e proyecto aki. Normalmente esey ta sosode cada 10 aña, pero den e caso aki na 1990 tabata e ultimo diseño y cu adaptacion na 2003, pues ta despues di 16 aña cu ta presenta e edicion nobo di placa di papel.
A haci un competencia entre varios artista pa nos placa di papel nobo y e ganado absoluto a resulta Nigel Matthew. A laga imprimi e biyetenan na Crane Currency di Merca. Prome cu a scoge e imprenta aki, tur otro biyete di Aruba a wordo imprimi na Haarlem, na Hulanda dor di e compania Royal Johan Enschedé. Mester menciona cu e compania a dicidi di sali for di imprenta di placa di papel na december 2016.
