E candidatonan Ivan Duque (Centro Democratico) y Gustavo Petro (Colombia Humana – Movimiento MAIS) lo bay pa e di dos buelta pa e Presidencia di Colombia.
Esaki ta despues di e pueblo Colombiano a cumpli cu nan derecho di voto diadomingo, 27 di Mei, tras di 99.76% di escrutinio, Ivan Duque a obtene 7.558.358 voto (39.13%) y Gustavo Petro 4.845.925 (25.09%). Ambos lo midi forsa di nobo den e eleccionnan di dia 17 di Juni proximo.
Votacion na Aruba
Pa loke ta e votacionnan na Aruba, compara cu 2014, un total di 722 Colombiano a vota y pa e di dos buelta 824.
E biaha aki e cantidad cu a vota tabata hopi mas compara cu e eleccion anterior. Di e 8000 Colombianonan cu tin residencia na Aruba, 2366 a vota. Akinan na Aruba, Ivan Duque a logra haya 1651 voto, cu ta representa 69.83% di e total di hendenan cu a vota.
Sergio Fajardo a logra bay cu 390 voto, cu ta representa 16.49% y Gustavo Petro a haya 224 voto, cu ta representa 9.47%.
Den e prome buelta aki, Ivan Duque a sali victorioso, sigui pa Sergio Fajardo y despues Gustavo Petro.
Awo Colombia y naturalmente mundo henter lo ta pendiente pa mira kico e resultadonan lo ta den e di dos buelta. Te awor aki Ivan Duque ta keda e faborito, sigui pa Gustavo Petro.
