Relaciona cu e informe recien cu nos di 24ora.com a ricibi den cua a señala cu ex-minister Otmar Oduber, e sospechoso principal den caso Flamingo, lo recobra su libertad, fiscal a indica cu nan ta disgusta cu e decision di hues comisario. Pues, segun a splica, fiscal a pidi pa prolonga detencion di e ex minister debi cu nan no ta cla cu ne pa loke ta e parti di investigacion. Sinembargo, hues comisario no kier a firma e peticion aki y a dicidi cu lo laga Oduber den libertad. For di fuente den ministerio publico a informa cu lo bay apela e decision di hues comisario ya cu nan no ta di acuerdo cu esaki.
A detene Otmar Oduber dia 10 di mei ultimo na oficina di Landsrecherce. Contrario na e otro detencionnan den otro caso di profiel halto, no a bay detene na su cas of den un luga publico, sino a laga invit’e n’e oficina di Landsrecherche y ey a detene na sitio. Apenas shete dia despues a muda Oduber di ward’i Shaba pa KIA. Despues cu Oduber tabatin apenas dies dia den total deteni, di cua tres tabata den KIA, hues comisario a opta pa dun’e su libertad.
