Diabierna den careda di 6’or y mey di atardi, polis a bay na un adres na Ponton, Hubadastraat 11-D. Eynan a bay atende cu un dentista trahando ilegal y tambe su status ta ilegal. Autoridad a haya ordo di detencion pa e dentista femenino aki. E ta traha na Aruba sin cu e tin un permiso pa traha y mas ainda, haciendo un trabao masha delicado cu ta trabao di dentista, caminda cu e parti di higiena y exigencianan mester ta na prome luga. A yega na e cas y probablemente nan lo a hay’e tambe den accion.
Na momento cu a haci e detencion, famianan no a aprecia y hasta a cuminsa altera cu polis.Polis a logra controla e situacion y a pidi pa transportwagen y a transporta e dentista ilegal pa warda di Playa. Den e mesun rosea tin cu bisa cu tabata importante pa haya declaracion di testigonan presente pa asina nan por haya e evidencianan necesario tocante e dentista ilegal aki, cu tabata eherce un profesion den un forma clandestino.
Esaki no ta unico dentista cu ta haciendo e trabaonan aki. Tin mas hende cu ta bin for di pazuid, cu tambe ta haciendo e profesion aki na Aruba. No solamente dentista, pero otro trabaonan tambe cu tin di haber cu cuido y cu ta un trabao cu mester tin e aparato y ekiponan necesario pa evita cu e por causa daño na salud di hende.
E caso aki sigur a hala atencion diabierna atardi laat, pa anochi, pasobra ta Inspectie Volksgezondheid Aruba (IVA) via fiscal di Ministerio Publico, ta esunnan cu a duna ordo pa detencion di e dentista ilegal aki, a base di yamadanan, investigacion y evidencianan cu a drenta na autoridad.
