Manera ya ta conoci den comunidad e conocido cantante di e banda di rock local Mental Displacement, Rafael “Rafa” Zawady a haya un accidente di auto basta pisa cu el a kibra su dos pianan y un brasa.Pero lamentablemente pa motibo di circunstancianan, no ta cubri’e pa e por haya tratamento den exterior.
Pa e motibo aki mes, amigonan di Rafa a organisa un bendemento di cuminda, pa asina recauda suficiente fondo pa asina por yuda contribui pa por manda Rafa Colombia pa e por haya e tratamento adecuado.Ya for di siman pasa caba Vanz Paskel, hunto cu Dario Quandus tabata na McDonalds Sero Blanco pa asina bende carchinan di cuminda pa e food drive, mientras tanto cu por haci donacion tambe riba su cuenta di banco na Aruba Bank, cuenta number 0866630290, na nomber di Rafael Zawady.
Awe un biaha mas amigonan di Rafa tabata na McDonalds pa asina sigui bende carchinan di cuminda. Ta trata aki di aros con pollo cu 3 palo di sate cu saus di pinda na balor di 15 florin y tambe tin sopi di carni na balor di 8 florin. E cuminda ta prepara pa Chef Dario Quandus kende ta un di e chefnan mas renombra na Aruba.
Fuera di ta bende cuminda na McDonalds diabierna y diasabra for di 4’or di atardi te cu 7’or di anochi, diadomingo tambe lo nan lo bay tey na e MFAnan den cada districto na cierto oranan stipula, pa asina haci e entrega di cuminda mas facil pa esnan cu kier esakinan entrega.
Pa esnan cu kier pasa busca cuminda, por acudi tambe na Semeleerstraat 9 riba diadomingo of tambe por tuma contacto cu Angelo Paskel na 5676733 of por tuma contacto cu Chef Dario Quandus na 5637035 pa pedido. Amigonan y demas famia Rockero di Rafael Zawady ta gradici un y tur pa e apoyo y sosten den e momentonan mas dificil cu e ta pasando aden.
