E siman di 13 pa 20 di augustus Korps Politie Aruba (KPA) a celebra nan Siman di Polis.
Un siman cu mester a termina dia 20 di augustus, pero door di awasero, esaki no por a continua, pa cual a hala esaki cu un siman. Asina tambe, diadomingo ultimo esaki a yega na su final. E weganan aki a tuma luga riba veld di Flatstone na Piedra Plat.
David Leer, Presidente di Comision Korpsviering, a indica cu despues cu mester a pospone e final pa un siman, diadomingo ultimo, esaki a tuma luga. Nan a cuminsa for di 9:00am y cu a dura te cu oranan di anochi.
Rib’e dia aki tabatin tambe varios otro wega, manera di domino. Tabata un dia yena di actividad, cu hopi deportivismo y tabata un exito total, Leer a bisa.
Tur hende a sa di bin apoya otro y e henter e siman tabata yena cu hopi alegria y union.
Den mayoria di actividad, districto di Playa tabata esun cu a sa di gana mayoria premio. Sigur un actividad hopi competitivo.
Henter e actividad di Korpsviering ta pa trece e coleganan hunto, pa nan sinta combersa, pafo di e ambiente di trabou.
Pa loke tabata e actividad final di kickingball, Districto di San Nicolas a sorprende team Playa y asina tambe a gana e actividad final aki, ganando e faboritonan di Districto Uno, cual ta Playa.
Pa cera e anochi aki, por a los e pianan riba e tononan di Jerrino Baas & Friends.