Awe marduga, na momento cu e fiesta di Hot Shots a caba pa 3:00 am den Renaissance Convention Center, lo mester a presenta un problema pafo. Na momento cu polis a yega no a constata nada, o sea cu e buscadonan di problema a bandona e sitio caba. Polis a ordena tur otro hende pa bay cas, pasobra e fiesta a caba. Pero semper tin un cu kier reta e defensornan di ley.
E hoben aki, probablemente bou di impresion di e presentacion di e DJnan paden y di e bon ambiente cu tabatin durante henter anochi, no kier a bay cas y mas bien tabata pendiente pa tende “unda e trip ta sigui”. Pesey ora polis a pidie pa bandona e sitio, el a nenga y a start un intercambio di palabra cu autoridad.
Durante su detencion, sperando pa e vehiculo di transporte, e polisnan na e sitio a haya un baño di insulto y menasa fo’i e tipo aki. E tabata demanda di nan pa nan dun’e nan nomber, pasobra e lo keha nan pa motibo cu a deten’e. Na ward’i polis a keda di present’e dilanti un fiscal auxiliar cu mester dicidi si e ta keda cera of ta lag’e bay cas.
Mayoria biaha, ora cu ta hende bebi, ta wanta nan den cel te mainta ora nan wayaba pasa y ta laga nan bay sigui sosega nan curpa riba un cama, en bes di riba beton den cel.
