Awe pasa di 4:30 am, polis tabata atendiendo cu un chauffeur burachi na altura di un club nocturno situa na Tanki Leendert, ora cu diripiente un homber a bin mete cu nan. E homber a cuminsa un pustamento di boca cu polis te cu el a opta pa cuminsa tira sla riba e defensornan di ley.
Polis no a acepta e comportacion aki y a manda e homber suela y a deten’e pa ta stroba polis den ehecucion di nan trabou. Di acuerdo cu e codigo di procedimento penal, mester listra un detenido asina cu deten’e. Wel, den e caso aki polis a bin topa cu un arma blanco, cu a haci e caso un poco mas serio.
E detencion na un prome instante tabata innecesario si e homber no a mete den un asunto cu no ta corepond’e. Pero probablemente bou influencia, a opta pa no sigui conseho di autoridad, cu a pidie pa sigui cana y pa no mete den trabou di polis. Pero e no a aprecia cu no tabata kier su presencia y a ora a bira agresivo, cu a haci cu mester a deten’e di biaha pa evita escalacion na e sitio di incidente.
A transporta e homber pa ward’i polis, unda a keda di present’e dilanti un sub-fiscal pa dicidi riba su encarcelacion of si ta lag’e bay su cas cu un multa bou brasa. E echo cu e tabatin un arma blanco den su poder ta haci su caso mas complica, pasobra ta cuestiona su intencion pa sali bay un club cu arma den saco.
