Fiesta na Honor di San Francisco di Asis y 100 Aña di Consagracion di Misa

163

Un Invitacion cordial na tur Parokianonan, Scolnan, Gobernantenan, Miembronan di Plan Pastoral 2018-2021 y Aruba en General, pa bin celebra hunto e fiesta na honor di San Francisco di Asis y 100 aña di consagracion di San Francisco.

Biografia di San Francisco

Francisco, a nace na Assisi, Italia na aña 1181, y tabata yiu di Pietro Bernardone y Pica. E tabata yuda su tata den negoshi y tabata envolvi den bida social di e famianan rico di e sociedad.

Durante di tabata rehen den un guera entre Assisi y Perugia, Francisco a sinta examina su bida. Di eynan el a cuminsa biba un bida cu  intenso oracion y compartiendo su bienes cu pobernan.

Conmovi pa un encuentro cu un leproso, Francisco a cuminsa traha meymey di leprosonan y otro marginadonan di sociedad. Su tata no tabata di acuerdo cu su manera di biba. Pero Francisco a prefera di sigui, maske su tata a deshered’e. Na aña 1208 el a cuminsa predica publicamente, y pronto el a atrae hopi siguidonan. Francisco a biaha pa Roma unda el a haya aprobacion di Papa pa su ordo, pa despues bolbe Assisi.

Na aña 1217 el a manda e prome misioneronan pa exterior y e mes a yega te Egipto. Bek na Assisi e tabata lider di por lo menos 3000 miembro di su ordo. Durante di un retreat na aña 1224, el a haya un vision y djey a sali cu heridanan di Cristo, stigmata, visibel riba su curpa.

San Franciso a muri riba 4 october 1226 y a wordo canoniza dos aña despues pa Papa Gregorio IX.

Su carisma, compasion y amor pa creacion di Dios, a hacie un di e figuranan mas popular di cristianismo.