Eagle Beach di Aruba ta famoso rond mundo, pa su santo blanco y lama bunita. Pero si no paga tino, e por bira notorio tambe pa e robonan cu ta tuma luga eynan. Un famia completo dialuna a bira victima di ladron(nan).
E famia aki a yega Eagle Beach rond di 2.30 di atardi. E ta un area cu nan gusta bishita cada biaha cu nan bini Aruba. Nan tin un familiar cu ta biba riba e isla pa cual no solamente nan ta bini pa disfruta di tur e bunita di Aruba, pero tambe pa encuentro familiar. Pero nan bishita na Eagle Beach dialuna atardi a finalisa cu hopi preocupacion. Nan a yega y a laga nan pertenencianan riba beach. Mientras cu nan tabata den lama, cada rato tabata tira bista unda cu a laga nan cosnan. Y di berdad, nan ta bisa, niun momento a nota cu tin hende a yega cerca di unda a laga tur cos poni hunto.
E sorpresa nan a ricibi momento cu rond di 5:00 pm a sali for di lama y a bay recoge nan cosnan y a constata cu esakinan a disparce. Nan a keda solamente cu loke nan tabatin bisti pa landa y e resto a disparce. Ni sikiera slof e ladronnan a laga atras.
Ta papia aki di cinco celular, cu ta celularnan cu ta costa riba 2 mil florin. Ta papia aki di 2 iphone 14 Pro; 1 iphone 14 y un iphone 13, mas un Samsung A-71. A laga tur e cosnan aki atras riba e beach dilanti di La Quinta.
Ta prome biaha den tur e biahanan cu sa bini Aruba cu algo asina ta tuma luga. Nunca nan a yega di pasa den un mal experiencia na Aruba. Cualkier persona cu ta ofreci un Iphone of Samsung A-71 tuma contacto cu polis inmediatamente.
