Diamars, dia 17 october, 2023, Partido AVP lo sigui brinda asistencia p’e yenamento di formulario di Impuesto n’e comunidad di San Nicolas na YMCA. For di 7:00 te 9:00 pm e team di boluntario di Partido lo ta presente na YMCA San Nicolas pa asisti e comunidad di San Nicolas cu yenamento di e formulario di impuesto 2022 (Inkomestenbelasting).
E miembronan di AVP, entre otro Rene Herde, Mike de Meza, Mervin Wyatt-Ras, Monica Oplaat, Dennerich Kelly, Wendrick Cicilia y Frits de Palm, lo atende comunidad cu otro tema cu por tin tambe y pa scucha e pueblo di San Nicolas na YMCA.
Desde e luna di september Partido AVP a inicia cu anochi di asistencia pa yenamento di e formulario di Impuesto na Cas di Partido Playa.
For di tur skina di Aruba e ciudadanonan a asisti na Cas di Partido p’asina ricibi ayudo cu nan formulario di e ekipo di experto boluntario. Un centenar di ciudadano a bin Cas di Partido Playa pa ricibi asistencia e ultimo simannan tras di lomba y a yena un cantidad di formulario di impuesto. Partido AVP ta contento cu e reaccion di nos comunidad y ta intenta pa mehora e servicio cada aña pa asina por sigui asisti nos ciudadanonan.
Diamars awo, 17 di oktober Partido AVP lo sigui brinda asistencia pa yenamento di formulario di Impuesto na YMCA San Nicolas.
E documentonan necesario cu lo mester trece ta resumen di entrada pa aña 2022 (Loonopgaaf), carta nan di interes di hypotheek (APFA, FCCA OF BANCO), carta di interes di prestamo personal (BANCO, ISLAND FINANCE OF TOTAAL FINANCE), recibo of comprobante di gasto extaordinario y adicional (CUIDO MEDICO, ESTUDIO y GASTO IREGULAR) efectua den aña 2022.
