Un y tur ta keda cordialmente invita pa e apertura di e exhibicion ‘ODA NA E PISCADOR’ diabierna dia 16 di juni pa 7:00 pm na e Fundacion Rancho, Visstraat 1, Oranjestad. E exhibicion aki ta presenta e obranan di artista visual local Samuel Sarmiento cu e curaduria di Ana Maria Hernandez.
Por bishita e exhibicion ODA NA E PISCADOR gratuitamente na Stichting Rancho na Visstraat 1 te cu dia 4 di augustus. E exhibicion lo ofrece un programa publico cu diferente actividad pa e comunidad den luna di juni y juli 2023.
ODA NA E PISCADOR ta un proyecto cu a recopila e storia- y fragmentonan di un di e bisindarionan mas antiguo di nos isla: Rancho. E proyecto ta enfoca riba e origen di Rancho como comunidad di piscado y e impacto di e desaroyonan social y ecologico riba e comunidad aki. E exhibicion ta ofrece e bishitantenan e oportunidad di acerca nan mes na e storianan di e comunidad Ranchero y e tradicion di pesca pa asina por profundisa nos relacion cu un parti di nos herencia cultural.
ODA NA E PISCADOR ta realisa bou e curaduria di historiado di arte y gestor cultural Ana Maria Hernandez. E proyecto ta forma parti di Stichting Rancho su programa celebrando e 200 aña di Oranjestad na 2024. ODA NA E PISCADOR ta un colaboracion cu Plataforma Aruba y ta realisa cu e sosten di Mondriaan Fund.
Pa mas informacion tocante e proyecto, bishita www.plataformaruba.org/ode-to-the-fisherman.
