A nombra ex-Minister Henk Kamp di 65 aña di edad como candidato pa tuma asiento den e Hunta di Supervision di “College Financieel Toezicht”, conoci como CFT. Den curso di e aña aki, Sybia Dekker lo tuma su retiro. E ta den e Hunta di Supervision di CFT representando Hulanda, desde Mei 2012.
Mester menciona cu ainda e nombracion oficial no a sali pa Henk Kamp, aunke esunnan yega na CFT ta sigura cu ta “asina ta”. Di otro banda, e actual Presidente di CFT, Raymond Gradus, a confirma cu ainda e procedura ta canando.
Henk Kamp tabata for di aña 2012 te 2017 den funcion di Minister di Asuntonan Economico den Gabinete Rutte II. Prome cu esey el a yega di ocupa varios otro funcion, entre otro den Tweede Kamer y hasta como Representante di Gobierno Hulandes na Boneiro y islanan BES. E ta miembro di partido VVD desde aña 1972. E lo bira e representante di Gobierno Hulandes den e colegio di supervision, mientras cu Robert “Chobby” Croes ta representa Aruba eyden.
