Dialuna mainta a probecha presencia di lider di Movimiendo Electoral di Pueblo (MEP) na e conferencia semanal di e partido, pa puntra tocante e diferencia di ponencia entre e investigacion riba partido POR y cu a ocasiona e kiebro di coalicion na 2021 versus e investigacion tumando luga den Arubahuis actualmente. Un biaha mas Evelyn Wever-Croes ta pidi pasenshi pa permiti e rapport keda cla pa asina e fiha su posicion. Mientrastanto e ta recorda politiconan di oposicion cu nan no tin base moral pa purba bruha tera ora ta trata di un investigacion di corupcion.
“Ami ta esun cu a cuminsa cu investigacion eynan inmediatamente. Mi a pidi Centrale Accountantsdienst (CAD) haci investigacion. E investigacion a wordo haci y aworakinan e ta den e fase di e consehonan cu mester bin riba mesa di minister y ministerraad,” asina Wever-Croes a indica. E ta haya dificil pa papia di dje tanten cu e no ta cla pa evita cu hustamente su contrincante por insinua cu el a daña e investigacion. “Dus mi ta compronde e ansha cu nan tin y mi kere mi mi tambe kier pa e caba lihe,” e politico a bisa remarcando cu e tambe ta cansa di e tema.
Aunke tin hopi otro reto pa atende, e ta consciente cu e casonan aki ta tuma su tempo, mescos a sosode cu Marisol Lopez Tromp y Benny Sevinger. El a expresa cu e ta spera cu den caso di Arubahuis no lo tuma asina tanto tempo, pero un fecha no ta den su man. Wever-Croes a bolbe sigura cu un bes e keda cla, e mes ta informa parlamento. “Mi ta kere cu en todo caso parlamentario Dowers ta un di e ultimo cu tin autoridad moral pasobra e tabata tin ministernan colega di dje cu a cay den investigacion penal mientras e ta minister di husticia y el a sinta un banda wak.”
Pa e relato completo, lesa edicion di TREMPAN
